New Delhi, Lber:
U shongknor jong ka seng AAP ha Delhi u Gopal Rai hynnin ka sngi u la ong ba ki nongïalam jong ka Liang Pyrshah, ka Indian National Developmental Inclusive Alliance (INDIA), kan sa ïasnoh kti lang na ka bynta ka jingïalang paidbah ha Ramlila Maidan ha ka 31 tarik, Lber na ka bynta ban ïada ïa ka synshar paidbah, kaba la thmu ban long hadien ka jingshahkem jong u Myntri Rangbah jong ka Delhi u Arvind Kejriwal.
Ha ka jingai jingkren ha ka jingïalang bad ki nongthoh khubor, u Rai u la ong ba ka seng Aam Aadmi Party (AAP) ka la pynkhreh bha ha kaba ïadei bad ka jingthmu ban pynlong ïa ka jingïalang paidbah khnang ban pynlong ïa ka kaba jop.
“Ki samla pule, ki samla, ki RWA, ki NGO bad ki kynhun jong ki riewpaidbah ki la shah khot shah wer ba kin ïasnohktilang ha ka jingïalang paidbah. Ha ka 27 tarik, Lber, ki nong-kitkam jong ka seng AAP bad ki Councillor kin sa pynlong la ki jong ki jingïalang paidbah ha Delhi,” u la ong.
Naduh ka 28 tarik, Lber, ki la don kumba 2,600 tylli ki kynhun kiba la leit rung ha man ki thliew ïing na ka bynta ban leit wer ïa ki briew ba kin don bynta ha ka jingïalang paidbah kaba ban long ha Ramlila Maidan.
Ha kajuh ka por, ki Myntri jong ka seng AAP bad ki MLA ki la thmu ban leit sha ki Assembly bad ban ïakren halor ki rukom pynkhreh na ka bynta ka jingïalang paidbah, la ong shuh shuh u Rai.
U Arvind Kejriwal u la shahkem ha ka 21 tarik, Lber ha ka kynhun Enforcement Directorate (ED) ha kaba ïadei bad ka jingshah kynnoh donkti ha ka jingpyndkoh treikam hapoh ka tnat Excise 2021-22, ha kaba mynta u dang don ha kti jong ka ED.
