Shillong, Lber 27
San ngut ki khynnah ïalehkai ka Jylla kiba don hapoh ka lama jong ka Meghalaya Gymnastics Association ki la ïoh ban ïashim bynta ha ka Sub Junior Artistic Gymnastics National Championship 2023-24 ba la pynlong da ka Khelgoan Public School hapoh ka jingkhmih jong ka Gymnastics Federation of India, ha Prayagraj kaba ha Uttar Pradesh.
Kine ki kynthup ïa ka Wansaphi Bernadette Malngiang (Loreto Convent), Wansuk Susngi (Government Girls Higher Secondary School), Sa-i-bakor Tariang (Synod Higher Secondary School), Rafellia Malngiang (St.Joseph English School) bad ka Athilia Susngi (Government Girls Higher Secondary School).
Ha kane ka lympung kaba la sdang naduh 20 haduh 22 tarik mynta u bnai, ki la don haduh 700 ngut ki nongïalehkai gymnastic kiba la wan ïashim bynta na ki 25 tylli ki jylla jong ka ri kiba la pynpaw ïa ki sap ïalehkai ba kyrpang jong ki ha ka Floor Exercises, Balancing Beam, Uneven Bars bad Vaulting.
Ïa kane ka kynhun la ïalam da ka General Secretary ka Meghalaya Gymnastics Association Kong Lucy M. Malngiang, kum ka Team Manager bad ka Kong Idalin Malngiang kum ka Coach.
Wat la kitei ki khynnah kim shym la ioh ban khur ïa ka jingjop, pynban ki la ïoh shibun ki jingmyntoi ban pynpw ïa ki sap ïalehkai ba kyrpang jong ki.
Na ka liang ka Synjuk ka la kyntu ïa ka Sorkar Jylla ban kan ïaleh ban pynbiang ïa ka jaka ïalehkai kilanmet khnang ba ki khynnah kin nanglah ban kilanmet lem bad u Coach ba pura bad ba ki lah ban pynpaw ïa ki sap ïalehkai ba kyrpang jong ki ha ki lympung ïalehkai hapoh ka ri bad shabar ri ruh kumjuh.
