Chennai, Lber:
Ki heh ba dei khmih ha ki kam ba ïadei bad ka ilekshon ki la ïoh ban kurup ïa ka pisa T. 69,400 na ki dkhot jong kawei ka longïing na Punjab ha Nilgiris distrik kaba don ha Tamil Nadu ha kaba ki la wan jngohkai. Ka durkhih halor kane ka jingjia ka la saphriang kylleng ha ki lad phah khubor, ha kaba la ïohi ba ka longkmie kaba rah ïa i khun jong ka, ka la ïam bad kyrpad ïa ki heh sorkar ba ki la dei ban pynphai noh ïa ka pisa.
Ki heh sorkar ki la kurup noh ïa kane ka pisa ha ka por ba ka la don ka jingkhmih bniah ïa ki kali ha ka Sngi U Blei kum shi bynta jong ka jingtreikam ka Model Code of Conduct. Ïa ka Model Code of Conduct la pyntreikam haba ka Election Commission ka la dep pynbna ïa ki tarik ban pynlong ïa ka ilekshon Lok Sabha ha ka 16 tarik, Lber. Ha ka durkhih ba la saphriang, la ïohi ba ka longkmie lem bad u kurim ki la pyrshang ban pynsngewthuh ïa ki heh sorkar ba kim shym tip ei ei na ka jingtreikam ka Model Code of Conduct na ka bynta ka Lok Sabha ilekshon.
Na ka liang jong ki, ki heh sorkar ki la batai shai shaphang ki kyndon ba la buh ha kaba ïadei bad ka jingdon jong ka ilekshon sha kine ki nongjngoh kai pyrthei. Ha ka durkhih, haba kane ka longkmie ka la kyrpad na u heh sorkar ban pynphai biang ïa ka pisa, u la ong ba yn sa pynphai ïa ka ha ka Lah Sngi U Blei. Ha kajuh ka por, u Assistant Returning Officer jong ka Nilgiris ha ka Lah Sngi U Blei u la khmih bniah ïa ki kot ki sla jong kine ki nongjngohkai pyrthei bad pynphai noh ïa kane ka pisa kaba la kurup na ki da ki heh ba dei ban pynïaid ïa ka ilekshon.
Katkum ka jingbatai bniah jong ka Election Commission, la ong ba lada lap ba don kiba rah ïa ka pisa kaba la palat ïa ka T. 50,000, ne kino kino ki tiar ne ki jingai sngewbha kiba la kot sha palat T. 10,000 yn kurup noh. Ïa kane ka jingkhmih bniah la pyntreikam halor ka jingthmu ban khanglad ïa ka jingpyndonkam bakla ïa ka pisa ha ka por ilekshon.
