Shillong, Lber 27
Ki synjuk ïalehkai kiba don hapoh ka shatri jong ka Meghalaya School of Martial Arts ki la pynpaw ka jingbynñiaw halor ka jingleh shiliang khmat ka tnat ïalehkai jong ka Sorkar Jylla halor ka jingpynsahteng ban pyllait ïa ki khusnam pisa sha ki khynnah ïalehkai kiba la khur jingjop ha ki lympung ïalehkai bapher bapher na ka bynta u snem 2022-23.
Kane ka jingleh shil-iang khmat ka paw shynna namar kiwei ki khynnah ki la dep ïoh ïa ki khusnam pisa naduh mynshem snem ha ka sngi rakhe ïa ka National Sports Day jong u snem ba la dep, katba kiwei pat kiba don kumba 400 ngut kim pat shym la ïoh haduh mynta.
Kine ki khynnah ki dei na ki jingïalehkai Muay-thai, Kickboxing, Arm Wrestling, Jeet Kune Do bad kiwei kiwei.
Haba ïakren bad ki lad pathai khubor ha ka Sngi Balang, u Bah Pynshai Mawrie uba long u dkhot ka Meghalaya School Of Martial Arts, u la pynpaw ba kum ki nongïalam jong ki synjuk ïalehkai ki la shah tharai sniew ha ki kmie ki kpa jong ki khynnah na ka daw ka jingpynslem ka Sorkar Jylla ban pyllait ïa ka khusnam pisa sha kitei ki khynnah.
“Kum ki nongïalam ngi shem jingeh ban pynshai sha ki kmie ki kpa jong ki khynnah namar ngim shym la ïoh ïa ka jubab kaba biang na ka Sorkar Jylla ha kaba ïadei bad ka khusnam pisa sha ki khynnah. Lada ka Sorkar ka dang pynsah-teng ïa katei ka pisa kan long ka jingduh-nong ïa ki khynnah namar kim lah ban bteng biang ïa kiwei pat ki lympung ïalehkai mynta u snem na ka daw ba kim don pisa,” u la bynrap.
Kumba ka paw kiba bun na ki khynnah ïalehkai ki dei kiba la wan na ki longïing ba duna ha ka ïoh ka kot, hynrei lada kim ïoh ïa ki lad jingïarap ne ki khusnam pisa na ka Sorkar Jylla kan pynlong ka jingkhanglad ïa ki ba kin dang ïai bteng ha ki kam ïalehkai jong ki.
“Katei ka jingai khusnam ka Sorkar ka dei halor ka jingwanrah jingjop ne ki takma ki khynnah ha ki lympung ïalehkai bapher bapher kiba la long shabar jylla.”
U Bah Pynshai u la ïathuh ruh ba haba leit ïalehkai shabar jylla, ka jinglut ka long kumjuh ïa ki senior, junor bad sub-junior, hynrei ka Sorkar pat ka phiah la ka jong ïa ki khusnam ha la ki jong ki kyrdan ïalehkai. “Ngi kyrpad ïa ka Sorkar ba ka dei ban bhah mar katjuh ïa baroh ki nongïashim bynta khnang ba kan ym ktah ïa ki khynnah kiba ïalehkai ha ka junior bad sub-junior.”
“Ki khusnam pisa ba la pynkhreh da ka Sorkar Jylla na ka bynta ki nongjop (senior) ha ki lympung ïalehkai shabar jylla ka long T.60,000 ia kiba khur takma ksiar, T. 45,000 ïa kiba khur takma rupa bad T.30,000 ïa kiba khur takma rnong. Hynrei ïa kiba khur takma ha ka kyrdan Junior bad Sub-Junior ka long kaba duna haba ïanujor bad ki senior bad ka jinglut pat ka long mar karjuh,” u la bynrap.
