Lucknow, Lber:
Ki la don arngut ki nong China kiba la shahkem ha Kakrahwa kaba don ha Siddharthnagar ha ka khappud Indo-Nepal hadien ba ki la rung beaiñ sha ki bynta jong ka Uttar Pradesh ha ka Sngi Ba-ar. Ïa kine ki briew kiba la shahkem la tip kyrteng kum u Zhou Pulin, uba dei u nongshong shnong jong ka Sichuan ha China, katba kawei pat ka dei ka longkmie ïa kaba la tip kyrteng kum ka Yuan Yuhan, kaba dei ka nongshong shnong jong ka Chongqing ha China.
Ki pulit ki la ïoh ruh ban kurup ïa ar tylli ki Passport jong ki nong China, ka Tourist Visa na ka bynta ka Nepal, ki Mobile Phone, ar tylli ki SIM Card China bad kumba 9 tylli ki Card ba bun jait ba la buh ha ar tylli ki pla ki barit. Kumba la ïathuh ki heh pulit ha ki nongthoh khubor la ong, “Ki la don arngut ki nong China kiba la shahkem katba ki dang wan rung beaiñ sha ki bynta jong ka ri ha ka 26 tarik, Lber, 2024. Ha kaba ïadei bad kane ka jingjia, la buh da ka jingujor ejahar hapoh ka kyndon 14(A) jong ka Foreigners Act 1946 ha ka jaka treikam jong ki pulit hadien ba la dep ban pynbiang ïa ki jingdonkam bad kine kiba la shah kem ki la shah phah sha ka ïingbishar.”
