Shillong, Lber 27
U MDC ka BJP uba mihkhmat ïa ka Tura ADC konstitwensi, u Bernard N Marak, u la ong ba u hehduh ka National People’s Party (NPP) u Conrad K Sangma bad ka MP ka NPP na Tura ka Agatha K Sangma ki dei ban shim ïa ka sienjam ban don ka jingïakynduh ban poi sha ka jingsngewthuh lang bad ki nongkitkam ka BJP ha Rilum Garo khnang ban weng ïa ki jingartatien ha kane ka ilekshon sha Ïingdorbar Lok Sabha.
Ha u kyrwoh, u Bernard u la ong katba ka ilekshon ka la nang jan, ki nongtrei ka BJP ki sngew ba kim long kiba donkam bad shah shet kylla ha ki katto-katne ngut ki nongïalam kiba khlem shim ban pynlut por ban pynpoi sha ka jingïatylli. U la ong ba ka jingbthah u National President ka BJP la burom da ki nongïalam ka BJP ha Meghalaya hynrei ban ïoh ka jingkyrshan ha madan, ka NPP ka dei ban ïakynduh ïa ki nongtrei ka BJP kiba don ha madan ha kylleng ka Rilum Garo.
U la ong ba ki don katto-katne ki nongïalam kiba shu ïakren sngewthuh bad ka NPP tang na ka bynta ka jingmyntoi shimet katba kiwei pat ki don kiba kwah ban ïa kyrdan ha ka Sorkar ha kaba kiba bun pat ki shu shah ieh kumto khlem don ba peit.
“Ki jingsngew jong ki nongkitkam ka BJP ki la mong bha ïa ka rukom leh ka NPP ïa ka BJP ha kine ki khyndiat snem da kaba ñiew kum ka Liang Pyrshah bad ñiewbeiñ ïa ki nongtrei ha ki shnong ki thaw. Ki nongkitkam ka BJP ki kwah ban ïoh ka jingkular ba ki dkhot ka BJP yn ñiew burom lang kumjuh. Hadien ba la wan ka jingbthah na ka BJP kmie na Delhi, ki nongtrei ka BJP ki la lap ïalade ba ki don ha ka bynta ban shim ïa ka rai ka ban long kham shajngai namar ka NPP ka ñiew ïa ka BJP kum ka Piang Pyrshah katba ka Congress bad TMC ki la long lypa ki Liang pyrshah,” la pynpaw une u MDC ka BJP na Tura ADC konstitwensi.
Kumta u Bernard u la ong ba ki nongkitkam ka BJP ki sngew ba ka dei ban don jingïakynduh ban sngewthuh lang hapdeng ka BJP bad ka NPP ban weng noh ïa ki jingkulmar jingmut ha madan lym kumta, bun na ki nongkitkam ka BJP kin nym trei smat ha kane ka ilekshon.
Ka BJP ka la duh ban ïakhun ïa ka ilekshon sha Ïingdorbar Lok Sabha na Shillong bad Tura konstitwensi namar ka BJP na Delhi ka la rai ba dei ban ai jingkyrshan beit ïa ka NPP ha baroh ar tylli ki konstitwensi.
