Singapore, Lber:
Katkum ki khubor, la ong ba uwei u nong India uba longtrai jong kawei ka kompeni kaba pyniaid ia ki bos paidbah ha Singapore, u la shah bat bad shah rai set patok haduh 13 taiew namar ka jingailad jong u ia kawei na kitei ki bos jong u ban iaid palat ia ka jingstet kaba la buh bad kaba long ruh ka jingpynkheiñ ia ki aiñ ñiah kali, bad ha kajuh ruh ka por ka long ka jingma ia kiba leit ba wan ha kitei ki surok ba katei ka bos ka dei ban iaid lyngba.
Ia utei u briew la ithuh kum u Sundram Retnam bad u la don 51 snem ka rta. U Retnam u don ia ka kompeni ba ju pyniaid ia ki SV Bus bad la ong ba kawei na kitei ki kali jong u, ka la iaid palat ia ka jingstet kumba 70km/hour haduh 75km/hour. Namarkata, utei u rangbah u la shah daiñ kuna ruh haduh SGD 500 hadien ba um shym lah ban tehlakam ia ka rukom iaid jong katei ka bos kaba hap hapoh ka bor bad ka jingkhmih jong u.
