Shillong, Lber 29
Ha ka jingtalasi kaba seisoh kaba la jia ha ka 28 tarik mynta u bnai, ki shipai ka 172 Bn BSF-Meghalaya ki la ïoh bat ïa kawei ka kali kaba kit bun bah ka shini da ka jingthmu ban shalan tuh sha Bangladesh.
Ka kynhun ha kajuh ka por ka la ïoh bat ruh ïa 2 ngut ki nong India hajan ki thaiñ khappud ka Kuliang hapoh East Jaiñtia Hills.
Katkum ki jingtip ba tikna, ki shipai BSF ki la pynithuh bad bat ïa kawei ka kali kaba kit 35,000 kilo ka shini. Katei ka kali ka wan na Ladrymbai ban leit sha ki thaiñ khappud ka Kuliang.
Hadien ba la tohkit, u nongñiah lem bad uwei pat u para nongñiah kim shym la lah ban pyni ïa ki kot ki sla ba biang haba ïadei bad katei ka shini.
Ka mar ba la ïoh kurup bad ïa ki 2 ngut kiba la shah bat la aiti noh sha ka shlem treikam ka tnad Customs ban leh ïa kaba donkam.
