Shillong, Lber 29
Ki kot ki sla jong ki kyrtong kiba la dep thep kyrteng ban ïakhun ïa ka ilekshon sha Ïingdorbar Lok Sabha na Shillong bad Tura konstitwensi ki long kiba biang lut.
Ka jingkhmih bniah ïa ki kot ki sla jong ki kyrtong kiba thep kyrteng ban ïakhun ïa ka ilekshon MP na kine ar tylli ki konstitwensi la peit bniah ha ka Sngi Palei.
Na Shillong Lok Sabha konstitwensi, ki don 6 ngut ki kyrtong kiba la thep kyrteng kiba kynthup ïa u MP ba mynta uba dei u kyrtong ka Indian National Congress (INC), u Bah Vincent H Pala, u Bah Robertjune Kharjahrin uba dei u kyrtong ka United Democratic Party (UDP) bad Hill State People’s Democratic Party (HSPDP), ka Kong Ampareen Lyngdoh kaba dei ka kyrtong ka National People’s Party (NPP), u Dr. Ricky AJ Syngkon u kyrtong ka Voice of the People Party (VPP), nalor ki kyrtong shimet kiba kynthup ïa u Prof. Lakhon Kma bad Peter Shallam.
U Bah Manuel Badwar ruh u la thep kyrteng kum u kyrtong pynap lypa ka Indian National Congress (INC).
Ïa ki kot ki sla jong baroh ki kyrtong la peit bniah hakhmat u Returning Officer uba dei u Deputy Commissioner ka East Khasi Hills district.
Na Tura Lok Sabha konstitwensi, ki kyrtong ki kynthup ïa ka MP ba mynta ka Agatha K Sangma kaba dei ka kyrtong ka National People’s Party (NPP), u Saleng A Sangma kum kyrtong ka Indian National Congress (INC), u Zenith Sangma kum kyrtong ka Trinamool Congress (TMC) nalor u Labenn Ch Marak kum u kyrtong shimet. Ïa ki kot ki sla jong baroh ki kyrtong la peit bniah hakhmat u Returning Officer uba dei u Deputy Commissioner ka West Garo Hills district.
Hadien ba la biang lut ki kot ki sla jong ki kyrtong, kaba sah mynta ka dei sa tang lada don ki kyrtong kiba weng noh ïalade na ka jingïakhun.
Ka tarik ba khatduh ïa ki kyrtong ban weng kyrteng ka dei ha ka Sngi Saitjaiñ (30 tarik Lber).
