Berlin, Lber:
Ka tnat na UN kaba dei khmih ia ki phetwir ha kane ka sien ka la wanrah ia ka kaiphod halor ka jingïap bad jingjah rngai jong ki phetwir kiba leit rung na kawei ka ri sha kawei pat. Ha kane ka kaiphod la ong ba ka jingjah rngai bad ka jingïap jong ki phetwir bun sien ka long namar ka jing- ngam jyllop ha ka por ba ki iaid lynti na ki duriaw bapher bapher lyngba ki lieng.
Katkum ka kaiphod ba la ioh buh jingkheiñ da ka UN, la ong ba ka jingdon jong ki phetwir kiba la khlad na kum kitei ki jingjia hapoh jong kine ki 10 snem ka la kot ia ka 36,000 tam. Kitei 36,000 ki long napdeng jong ki 64,000 tam kiba khlad ha ki jingjia bapher bapher nalor jong ki jingjia ngam jyllop bad kiwei kiwei .
Katei ka kaiphod ka dei kaba la ioh lum da ka tnat International Organization for Migration (IOM) jong ka UN.
Hynrei la ong ba bun sien hi ki phetwir ki ju leit rung na kawei ka ri sha kawei pat, da kaba iaid lyngba na ki duriaw ban ioh rung tuh lyngba ki bynta khappud jong ki ri namar ym don lad da kumwei pat lada kim leh da katei ka rukom khnang ban lait na ki jingshah bat ne shah kem.
