Nongstoiñ, Lber 28
Ki nongïalam jong ka All India Trinamool Congress (TMC) Nongstoiñ Block hapoh ka jingïalam jong u Bah Macmillan Kharbani kum u President, ha ka 28 tarik u Lber 2024, ki la leit ban pynïasoh noh ïalade sha ka National People Party (NPP) hadien ba ki la khylliap lama noh ïa ka TMC ha Nongstoiñ namar ka jingsngewthuh ba ki briew jong ka thaiñ kim pat pdiang satia ïa katei ka seng.
Kitei nongïalam ka TMC-Nongstoiñ kiba la leit ban rung bad pynïasoh bad ka NPP, nalor u Bah Macmillan Kharbani, ki kynthup ruh ïa u Bah Hubert Kharbani, General Secretary, TMC Nongstoiñ bad Bah Paskal Nongrum, Joint Secretary bad kiwei-kiwei .
Ha katei ka sngi la pdiang sngewbha ïa kitei ki nongïalam ka TMC da u Bah Macmillan Byrsat, President ka NPP Nongstoiñ Block bad West Khasi Hills ryngkat ki nongïalam ka NPP Nongstoiñ Block hapoh ka ïingsah jong u kaba don hapoh ka shnong Pyndengrei, Nongstoiñ.
U Bah Macmillan Byrsat, MLA barim ka Nongstoiñ ha kajuh ka por kum u President ka NPP Nongstoiñ Block bad ka West Khasi Hills u la ong, “To ngin ïa klet noh ïa kaei kaba la dep hynrei ngin peit kaei ba ngi donkam ban leh nangne shakhmat na ka bynta ban kyntiew ïa la ka dong ka thaiñ.”
“Ngi ïohi shai ka Jylla Meghalaya, mynta la rieh tngen beit tang ha ka jingieid jaidbynriew tang ban ïoh ‘vote’, hynrei ïa ki jingshisha ngim dei ban bakla hynrei ngi dei ban kren ïa ka jingshisha, bad kum ka NPP ha Nongstoiñ ka da pynpaw ïa ka jingsngewtynnad bad sngewkmen ïa ka jingwan ban pynïasoh jong une u rangbah bad ka kynhun jong u sha ka NPP,” la ong u Bah Macmillan Byrsat.
U Bah Macmillan Kharbani pat u la pynpaw da kaba ong, “Ngi don tang kawei ka daw ba haba ngi ïaleh ilekshon ruh ka jingthmu ka jong ngi ka long ban shakri ïa u paidbah ban kyntiew ïa ka ïoh ka kot ban wanrah ïa ka roi ka par bad ban peit ïa ka jingeh jong u paidbah.”
“Haba peit ïa ki matti jong une u rangbah nongïalam (Macmillan Byrsat) ngi ïohi ba kat shaba ngi phai ki dei ki matti ki jong u. Na kata ka daw haba ieid jaidbynriew ngi dei ban leh eiei ban pynbha ïa ka jaidbynriew. Kam long ba ngin ieid jaidbynriew tang na shyntur ka jong ngi. Kumta ki kam jong une u rangbah ka pynlong ïa ngi ban ïa pyrkhat bad ngi khlem wan ban pynïasoh bad ka NPP da ka jingsngew hynrei ngi wan ynda ngi la pyrkhat bha bun-bun sngi ïa kaba ngi sa shim ïa ka rai.”
