Nongpoh, Lber 29
Hadien ka jingpynsangeh noh jong ka Shad Sajer Committee, ka Elaka Nongpoh ïa ka jinglehniam Shad Sajer, na ka liang ka Dorbar Raid Nongpoh mynta ka la pynkhreh pat shaid-shaid ban pynlong ïa kane ka jinglehniam Shad Sajer ha ka 30 tarik mynta u bnai ha u Lum Wortoh uba ju tip ruh kum u Lum Kñia kum shi bynta ban pynim biang ïa kane ka jinglehniam hadien 30 snem tam.
Ha ka jingleit jngoh jong u nongthoh khubor ha ka Sngi Palei la ïohi ïa ka jingpynkhreh kaba shaid-shaid ha kane ka jaka naduh ka jingshna ïa ki Ïingsad, ki jaka shongthait, ki jaka lehkai bad ruh ka jingpynbha ïa ka surok ban poi sha kliar jong utei u Lum Wortoh uba long ruh kum ka jaka jngohkai kaba lah ban ïohi kyndiang ïa ka sor Nongpoh baroh kawei.
Haba ïoh ban ïakren bad u Bah Linus Lyngdoh, Lyngdoh jong ka Raid Nongpoh, u la ïathuh ba kane ka jinglehniam Shad Sajer ka dei kum ka jingainguh sha U Blei Nongbuh Nongthaw halor ki jingkyrkhu kyrdoh ïa ki jingthung jingtep jong ki khun ki hajar ha kine ki snem baroh shisnem.
U Bah Linus Lyngdoh u la ïathuh ruh ba kane kan dei ka sien ba nyngkong ba ka Raid Nongpoh kan pynlong biang ïa kane ka jinglehniam, kata hadien kumba 30 snem tam ba khlem pynlong shuh ïa kane ka jinglehniam kaba kyrpang jong ki khun ki hajar ka Raid Nongpoh naduh hyndai hynthai.
U la ong ruh kumba kane kan dei ka sien kaba nyngkong, ki don shibun ki jingeh kiba kum ki nongïalam ki ïakynduh, hynrei wat hapdeng kita ki jingeh, ki la rai ban ïaid shaphrang ban pynkhie im biang ïa kane ka jinglehniam.
U la ong ruh ba ha kine ki sngi, ki khun samla bad ki paidbah ki la sdang ban klet ïa kane ka jinglehniam kaba kyrpang jong ka Raid Nongpoh, kumta kum ki nongïalam jong ka Raid ki la sngewdei bad ibit ban pynkhie im biang ïa kane ka riti ka dustur tynrai da kaba ong ba lada im ka riti ka dustur, ka jaidbynriew ruh ka im.
Shuh shuh u Bah Linus Lyngdoh u la pyntip ba nalor ka Raid Nongpoh, kiwei de ki Raid ba kynthup ïa ka Raid Sohkhwai, Raid Nongkhrah, Raid Nonglyngdoh kin wan ban ïashim bynta lang ha katei ka jinglehniam Shad Sajer ha kaba ki paidbah kin ïoh ban sakhi ïa ki jingshad tynrai bapher-bapher jong ki Raid kane ka thaiñ, ki jingïalehkai tynrai ba kynthup ïa ka jingïatan tyllai, ka jingkiew siej bad kiwei-kiwei.
Halor kane ka bynta, na ka liang u Bah Linus Lyngdoh bad ka Raid Nongpoh hi baroh kawei ka khot ka wer ïa ki paidbah jong ka Raid Nongpoh bad na kiwei-kiwei de ki jaka jong ka Ri Khasi ba kin wan ban sakhi ïa kane ka jinglehniam kum shi bynta ban ai mynsiem bad pynneh-pynsah ïa kane ka riti ka dustur jong ka thaiñ.
