Shillong, Lber 29
Ka Shillong Lajong FC ka la mad biang ïa ka jingshah rem ha ka jingïalehkai shabar na la ïing ha ka lympung ïalehkai I-League hadien ba ka la shah pynliem noh ha ka Delhi FC da 3-1 kol ha ka Sngi Palei.
Kane ka jingshah rem ka la wan lyngba ka hat-trick ba la thep da u Sergio Barboza na ka bynta ban pynlong ïa ka Delhi ban ïai sah ha ka kyrdan ba hynñiew kata hadien ïa ka Shillong Lajong.
Ha kane ka jingïakhun kaba la long ha Namdhari Stadium kaba ha Sri Bhaini Sahib, baroh ar ki kynhun ki la ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step.
Dei ha ka kylla miet ba utei u rangïalehkai na Brazil u la ïoh ban pynkhih jar nyngkong lyngba ka penalty ha ka minit kaba 65 bad hadien shiphew minit u la ïoh ban pynbud biang ïa ka kol kaba ar.
Hapdeng kane kane ka jingïakhun, u Barboza u la thep biang sa shi kol na ka bynta ban khur syndon ïa ka hat-trick ha ka minit kaba 90+3′ na ka bynta ban pynlong ïa ka Delhi ban tam da 3-0 kol. Hynrei shwa ban wai artad ka Lajong ka la lah ban pynphai kylla shi kol lyngba u Allen Camper Lyngdoh (90+5′) bad ban mad syndon ïa ka jingshah rem.
Ka Lajong ka la wanphai shwa sha la ïing na ka bynta ban pynkhreh ïa ka jingïakhun pyrshah ïa ka Mohammedan Sporting ha ka 6 tarik u Ïaiong, katba ka Delhi kan ïalehkai biang ha la ïing pyrshah ia ka Rajasthan United ha ka 5 tarik.
