Imphal, Lber:
Hadien ka jingïoh ban kurup ïa kiba bun ki tiar siat bad pynbthei ha Bishnupur distrik, ki pulit jong ka Manipur ki la ïoh ban kem ïa saw ngut ki briew ha ka sngi Balang ha kaba ïadei bad ka jingdonkti jong ki ha kane ka jingïoh ban kurup ïa kine ki tiar. Ïa kine kiba la shahkem la tip kyrteng kum u Salam Rameshwor Singh, Tongbram Gyanjit Singh, Pukhrem Ingocha Singh, bad u Thokchom Temba.
Ki heh pulit ki la ïoh ruh ban kurup ha ka por ba la khmih bniah na ki, ïa kiba bun ki tiar, kiba kynthup ïa ki suloi SLR bad saw tylli ki Magazine ba thylli. Shuh shuh ki la ïoh ruh ban kurup, ïa 20 song ki kuli ïasiat, 7 tylli ki Mobile Phone, ka Baofeng Walkie Talkie, ar tylli ki kali bad kumjuh ar tylli ki pla bad kiba bun kiwei pat ki tiar. Ha kaba ïadei bad kane, ki pulit ki la pynlong ïa ka jingtohkit kaba bniah.
Hashwa kane, ka kynhun jong ki shipai ïada ri ki la pynlong ïa ka jingleit khynra ha kiba bun ki thaiñ jong ki distrik ba don ha ki jaka lum bad ki jaka them. Kum shi bynta ban wanrah ïa ka shongsuk-shongsaiñ bad ka jingshngaiñ, ki kynhun jong ki shipai ïada ri ki la pynlong ïa ka jingleit khynra sha kiba bun ki jaka bad ki thaiñ kiba don ha ki jaka lum bad ki distrik kiba don ha ki jaka them.
Na kine ki jingleit khynra ka kynhun shipai ka la ïoh ïa ka jingjop na ka jingïoh ban kurup ïa kiba bun ki tiar siat bad ki tiar pynbthei bad ki tiar kiba long beaiñ kynthup u drok.
Ha ka por ba la pynlong ïa ka jingpyntreikam, kaba la sdang naduh ka 25 tarik, Lber, 2024, ha Maphou Bazaar bad ka shnong Maphou Kuki kiba hap hapoh ka Thoubal Dam-PS, Imphal East District, ki shipai ïada ri ki la ïoh ban kurup ïa kiba bun ki tiar siat bad ki tiar pynbthei.
Kine ki tiar ki kynthup ïa uwei u Improvised Mortar, uba jrong da kumba 6 phut, 2 tylli ki bipod/mount units, kawei ka base plate, 32 song ki bom ba la shna hi, 5 tylli ki tiar ba la pyndonkam na ka bynta ki jingsiat, uwei u bom uba don ka jingkhia kaba 1.5 kilo, 1.5 meters u Cordtex wire, 2 tylli ki Lighter, u Heroiñ ba don ka jingkhia ba 20 gram, 2 36 tylli ki bom kawang kti, uwei u Pompie Mortar, 60 tylli ki jingsiat bad kiwei pat ki tiar kiba long beaiñ.
