Mendipathar, Lber 29
U khlieh nongïalam ka NPP bad Myntri Rangbah ka Jylla, u Conrad K. Sangma u la ong ba ka MP ka Lok Sabha, ka Agatha K. Sangma ka long kum ka ‘nongrah ktien jong ka Meghalaya’ sha Parliament ban pyntyllun ïa ka ‘agenda’ jong ka jingkiew ha ka roi ka par.
Haba ïashim bynta ha ka jingïalap ilekshon jong ka NPP ha North Garo Hills, u Myntri Rangbah u la ong, “Baroh ki Jylla ki phah ïa ki jingtyrwa sha Delhi, ka Meghalaya ka leh kumjuh, hynrei donkam ban buddien ïa kine ki jingtyrwa, bad ka MP jong ngi, ka Agatha Sangma ka la ïakren bad ki nongïalam ha Delhi ban pyntikna ba ngi ïoh ïa ka bhah kaba bun. Kum ka nongrah ktien ka Meghalaya, ka pynsngew ïa ki jingtyrwa jong ngi sha u Myntri Rangbahduh ka ri, ki Myntri Sorkar, bad ki heh ophisar ha Delhi, ban pyntikna ïa ka jingïaid beit ka kam.”
U Sangma u la ai jingïaroh ruh ïa ka Agatha halor ka jingpyllait ïa ki projek bapher-bapher na bynta ka Jylla, kiba la synñiang sha ka jingkylla ba dang ïaid ha ka roi ka par.
“Ka long kaba donkam ba ngin jied ïa ki MP, kiba lah ban trei ryngkat lang bad ka Sorkar Jylla. Ka long ruh kaba donkam ba ngin don ïa ki MP kiba don ki jingïadei kiba ïajan bad ka Delhi. Ka MP ba mynta ka la don slem ha ka kam bad ka la trei na bynta lai sien kynthih, bad nga kyrpad ïa ki nongthep ‘vote’ ban kyrshan ïa ka khnang ba ka lah ban bteng ïa ka jingtreikam bad ka Jylla kumjuh ban nang kyntiew ïa ka ‘agenda’ jong ka jingkiew ha ka roi ka par,” u la bynrap.
Haba kren shaphang ka synshar-khadar kaba ïalam sha ka jingmanbha hapoh ka jingsynshar ka NPP ha ka Jylla, u Sangma u la ong ba ki la don katto-katne ki sienjam ha ka liang ki kam pynroi kiba la ïaid hapoh ka Jylla bad ka North Garo Hills ka long shi bynta jong kane ka lynti ïaid jong ka roi ka par.
“Ki Sorkar kiba la wan iwei-hadien-iwei ki la pulom ban khmih ïa ka bha ka miat jong ki briew jong ngi. Ki la pulom ban pynlut ha ki jingdon-jingem ba donkam, ki la pulom ban pynlut ha ka bha ka miat, hynrei ka Sorkar NPP ka la pyni sha la ki paidbah ba ïa ki jingkular la pynurlong da ki nongïalam ka NPP,” la bynrap u Sangma.
U Sangma u la ai jingkren ha kiba bun tylli ki jingïalang ilekshon hapoh Mendipathar konstitwensi jong ka North Garo Hills ha ka Sngi Palei ban pan jingkyrshan ïa ka kyrtong ka NPP, ka Agatha K. Sangma, na bynta ka 2-Tura Lok Sabha konstitwensi, ka ban leit sha ka ilekshon ha ka 19 tarik u Ïaïong.
Ha kane ka sngi la synran lang ïa u Sangma da u Symbud Lamphang ka ïingdorbar thawaiñ, u Timothy D. Shira, Myntri ka tnad PHE, Marcuise Marak, MLA, Marthon Sangma bad kyrtong MP na Tura, ka Agatha K. Sangma na bynta ki jingïalang ha Chisimari, Keragalram bad Gajingpara.
Haba ai jingkren ha ka jingïalap ilekshon, ka Agatha ka la kyrpad ïa ki paidbah ban ‘vote’ ïa ka NPP ban pyntikna ba ka jingnang kiew ha ka roi ka par ka bteng hapoh ka Jylla.
“Lada ngi jied ïa ki MP na kiwei-kiwei ki seng saiñ pyrthei, kan long ka jingduhnong bakhraw na bynta ka Ri-lum Garo. Kum ki nongmihkhmat jong ki briew jong ngi na Tura Lok Sabha, nga la lah ban pynsngew ïa ki jingsngewkhia jong ki briew jong ngi. Ha ki 6 snem ba la dep jong ka Sorkar NPP hapoh Meghalaya, nga la lah ban trei bad ka Jylla ban pyntyllun ïa ka ‘agenda’ jong ka roi ka par,” ka la ong.
Haba pynkynmaw ba ha ki por ba la leit – ha ki por ïalap ilekshon, ki paidbah ki ju kren halor ki mat ba ïadei bad ki surok ki syngkien, umbam-umdih, jingbym biang ki jingdon-jingem ha ki skul bad jaka sumar, hynrei ha kane ka jingïalap ilekshon ba mynta, ki briew ki ai khublei ïa ki.
“Ki paidbah ka Ri-lum Garo ki la ïohi ïa ka kam bad ka roi ka par ba la leh da ka Sorkar NPP hapoh ka Jylla,” ka la bynrap.
