Shillong, Lber:
U kyrtong shimet u ban aireng ha ka ilekshon MP sha ka ïingdorbar ka Lok Sabha u la ong ba u don ka jingkyrmen ban jop ha kane ka ilekshon namar kiba bun ki paidbah ki kwah ban ïohi ïa ki jingkylla kiba bha bad kum u kyrtong uba mihkhmat na ka bynta ka sur jong ki khun samla ka jylla, u kyrmen skhem ba lada ki paidbah ki jied bad ki pynjop ïa u, un lah ban leh ïa kaei kaba u thmu ban leh na ka bynta jong ki.
Haba kren sha ki lad pathai khubor ha ka Sngi Ba-ar hadien ba la dep thep kyrteng kum u kyrtong shimet hapoh ka shlem treikam jong ka Deputy Commissioner (DC) ka East Khasi Hills District, u Bah Kma u la ong ba ka thong bad ka jingthmu jong u ka long ba un thaw ka lad ai kam ai jam ïa ki samla ka jylla kiba don ïa ki sap ha ki liang bapher-bapher.
U Bah Kma u la ong ba um kwah ban kdew kti ïano-ïano ki nongmihkhmat ha kaba ïadei bad ka jingpyndonkam jong ki ïa ka pisa ka tyngka jong u paidbah. Hynrei kum u nonghikai ka bynta jong u ka dei ba un pyni da kawei ka lynti bad da kawei ka jingmut jingpyrkhat namar kam don jingmut ïa u ba un shu hiar shapoh madan ban ïakhun ïa ka ilekshon ban long kum kiwei-kiwei ki nongmihkhmat. Lada u kwah ban long lang kum kiwei ki nongmihkhmat katta u la leit pynïasoh bad kiwei ki seng lane u la leit ban ai jingkyrshan ïa kiwei pat ki kyrtong ki ban ïakhun ïa ka ilekshon.
Haba kylli na kaei ka daw ba u la jied ban ïeng kum u kyrtong shimet, u Bah Kma u la ong ba ka daw ka dei namar ba um ïahap satia bad kino-kino ki mat treikam jong ki namar ba u don ïa la ki jong ki nongrim bad ki mat treikam.
“Nga ïohi ruh ba ki don napdeng jong ki seng kiba noh palat sha ka niam bad ki don kiba long pyrshah shaba palat ïa kiwei ki Jaitbynriew ne ïashah palat ïa kawei ka Jaitbynriew, hynrei lada kwah ba kan don ka jingkiew bad ka jingkylla ka dei ban long kaba ïashah mar katjuh ym kaba noh shiliang sha kawei ka Jaitbynriew, ngan trei na ka bynta jong baroh khnang ba baroh kiba duna bor bad ki nongkyndong ruh kin kiew lang”, la ong u Bah Kma.
U la ong ba haba u phai khmat mynta sha kino-kino ki nongmihkhmat ka jylla um ïohi satia ïa u nongmihkhmat uba biang, bad kumta u da thrang bad angnud shikatdei eh ba un long uta u kyrtong uba ki khun samla kin phai khmat.
Shuh shuh u Bah Kma u la ong ba ka kam saiñ pyrthei kam dei ka kam ban shu ïaleh shongshit tang namar ka jingsngap ïa ki jingrwai ne ki jingshad ne ka jingpynlong ïa ki jingkhawai sngewbha hynrei ha u kumba long ka pule ka puthi, ka saiñ pyrthei ka dei ka kam kaba donkam.
“Ka politik kam dei ba phin shu leh shongshit hangne-hangtei tang namar ba phi sngap ïa ka jingrwai ne ka jingshad ne ba ki don kiba pynlong da ka jingïalehkmen hynrei ha nga hi, ka saiñ pyrthei kumba long ka pule ka puthi ka dei ka kam kaba khia thew bad kaba donkam bad nga ruh nga shimkhia ïa ka da kaba ngan pyrshang ban peit sha ki kyndong-kynshrot jong ka jylla wat lada nga dei tang u kyrtong shimet ngan pyrshang katba lah”, la bynrap u Bah Kma.
Haba kylli na ka shap aïu ba un ïeng ban ïakhun ïa ka ilekshon, u Bah Kma u la ong ba u la thep lai tylli ki shap ba u thmu ban ïeng. Ïa ka jubab ba un ïoh da ka shap aïu ba un ïeng un sa ïoh jingtip ha ka 30 tarik u Lber 2024.
“Nga la thep lai tylli ki shap hynrei lada ka dei ka mon jong U Blei ngan ïoh da ka shap kaba nga la thep nyngkong hynrei mynta ngam pat lah ban pynpaw namar u don sa uwei u kyrtong shimet bad ïoh lehse utei uwei u kyrtong shimet ruh u pan ïa ujuh u shap”, la ong u Bah Kma.
