Shillong, Lber 29 (UNI)
Ka seng Congress ka la pynbna ba ka jingïalang paidbah lane ka ‘Rally’ ha ka 31 tarik Lber ha madan Ramlila ban pynlong da ka kynhun INDIA ka dei ban pyrshah ïa ka jingsynshar donbor jong ka sorkar u Narendra Modi uba la kynnoh ba u don jingthmu ban pynkut syndon ïa ki seng kiba don ha ka liang pyrshah.
Haba kren sha ki lad pathai khubor, u General Secretary ka Congress, u Jairam Ramesh, u la ong, “Kane kan dei ka jingïalang saiñpyrthei bad ka jingthmu bakongsan ka long ban pyni ïa ki jingma kiba ap ïa ka jingsynshar paidbah na ka rukom leh jong ka BJP bad jong u Myntri Rangbahduh uba kwah ban pynpaw ba kan don tang kawei ka ri khlem ki ilekshon.”
Nalorkata, u la kynnoh ba ki jingleh jingkam jong u Myntri Rangbahduh ki pyni shai ba kan ym don ka ilekshon kaba laitluid bad ba ka Election Commission ka khlem ïakynduh ïa ka kynhun INDIA (INDIA Alliance) ban ïakren halor ka mat kaba ïadei bad ki VVPAT.
“Mynta, ki la pynhiar thma sa da ki briew jong ka Income Tax pyrshah ïa ka Congress bad ki katto-katne ki seng kiba don ha ka liang pyrshah da kaba plie biang ïa ki kam kiba ïadei bad ka jingsiew khajna kiba la sahkut mynta la 34 snem. Hynrei ka BJP pat kam shym la shah leh eiei,” la ong u Ramesh.
Shuh shuh utei u nongïalam ka Congress u la ong ba ka jingïalang ha ka Sngi U Blei kan dei ka sien kaba ar jong ka kynhun INDIA hadien ba la pyndep ïa ka “Bharat Jodo Nyay Yatra” ha ka 17 tarik Lber ha Shivaji Park, Mumbai ha kaba ki nongïalam ka INDIA ki la ïashim bynta, bad u la khmih lynti ba katei ka jingïalang ha madan Ramlila kan long kumjuh.
U Ramesh u la ïathuh ruh ba ki pulit ka Delhi ki la ai jingbit ha ka Sngi Palei ban pynlong ïa katei ka jingïalang paidbah.
