Chennai, Lber:
U MP jong ka Tamil Nadu A Ganesamoorthy, ïa uba dang shen la ïoh jingtip ba u la thmu ban bthat la ka jingim da kaba dih da ka dawai pynïap khñiang, u la khlad noh na ka jingthut treikam u klongsnam hynnin ka step.
U MP jong ka Marumalarchi Dravida Munnetra Kazhagam (MDMK) u la shah pynkit sha KMCH kaba dei ka jaka ai jingsumar jong ki riewshimet kaba don ha Coimbatore.
U MP jong ka Erode u A Ganeshamoorthy kumba la ïathuh ka tyllong khubor la ong ba u la thmu ban shim la ka jingim hadien ba ka seng MDMK ka la kyntait ban ai tiket sha u na ka bynta ban ïakhun ha ka ilekshon Lok Sabha.
Ki doktor ha KMCH Hospital ki la pynbna ba u la ïap ha ka por 5.05 jong ka step Sngi Palei bad ïa ka met jong u la phah sha ka hospital sorkar kaba don ha Perundurai ha Erode na ka bynta ban leh ïa ka Postmortem.
U Ganesamoorthy u la shahjied na ka tiket jong ka seng DMK ha u snem 2019 ha ka jingïakhun ïa ka ilekshon Lok Sabha na Erode.
U la ud shitom na ka jingtlot bad king baïong bad la pynkit ïa u sha ka jaka ai jingsumar da ki bahaïing jong u.
Hadien ba la khmih bniah ïa u la buh ha ICU bad la buh ruh hapoh ka Ventilator, la ïathuh ka tyllong khubor kaba la wan na ki pulit.
U Ganesamoorthy u la ïathuh ha ki bahaïing jong u ba u la dih da ka dawai pynïap khñiang.
Kham hadien ïa u la pynkynriah noh sha ka jaka ai jingsumar jong ki riewshimet kaba don ha Coimbatore ha ka por 2:30 nohphai sngi ha ryngkat ar ngut ki doktor bad ki bahaïing jong u ha ka kali kit nongpang hynrei u la khlad noh ha ka step kaba bud.
