Ki kot ki sla jong ki kyrtong kiba don jingthmu ban ïakhun ïa ka ilekshon MP Lok Sabha na Shillong bad Tura Parliamentary Constituency ki la biang lut nadong shadong, bad mynta ka dei ka bynta jong ki paidbah nongthep ‘vote’ ban jied ïano ki sngewbit ban jied ban long kum kita ki nongmihkhmat lane nongthaw aiñ jong ki. Ban kham ïa shai, ki kyrtong na Shillong Parliamentary Constituency ki kynthup ïa u MP ba mynta, u Bah Vincent H Pala na ka seng Congress, ka Kong M Ampareen Lyngdoh na ka National People’s Party (NPP), u Dr Ricky AJ Syngkon na ka Voice of the People Party (VPP), u Bah Robertjune Kharjahrin na ka United Democratic Party (UDP) da ka jingkyrshan lang ka Hill State People’s Democratic Party (HSPDP), bad ki arngut ki kyrtong khlem seng lane ‘Independent’, u Dr Lakhon Kma bad u Bah Peter Shallam. Na Tura Parliamentary Constituency, ki nongïakhun ki kynthup ïa ka MP ba mynta, ka Agatha Kongkal Sangma na ka NPP, u Saleng A Sangma na ka Congress, u Zenith M Sangma na ka All India Trinamool Congress (AITC), bad u Labenn Ch. Marak kum u kyrtong khlem seng (Independent).
Lah ban kdew ba ha Meghalaya, ka jingdon ki nongthep ‘vote’ ka la kiew da 55,971 ngut ha ka shi snem, kata, hapdeng u snem 2023 bad u snem 2024. Ka jingdon ki nongthep ‘vote’ baroh, kata, shynrang, kynthei bad ki ‘Third Gender’ ka long 22,17,100 ngut. Na kine, 10,94,947 ngut ki dei ki shynrang, 11,22,150 ngut ki dei ki kynthei bad lai ngut ki dei ki ‘Third Gender’. Namarkata, ka jingdon ki kynthei kum ki nongthep ‘vote’ ka tam da 27,203 ïa ki shynrang. Na kitei ki 22,17,100 ngut, ha ka Shillong Parliamentary Constituency kaba kynthup ïa ki 36 tylli ki konstitwensi MLA, ki don 13,96,054 ngut ki nongthep vote.
Ki nongthep ‘vote’ ha Tura Parliamentary Constituency kaba kynthup ïa ki 24 tylli ki konstitwensi MLA ki don 8,21,046 ngut ki nongthep ‘vote’. Kane ka long katkum ka thup kyrteng jong ki nongthep ‘vote’ kaba la pynmih ha ka 5 tarik Kyllalyngkot, 2024. Ha Shillong, ki shynrang ki don 6,81,769 ngut bad ki kynthei ki don 7,14,283 ngut. Ha Tura pat, ki shynrang ki don 4,13,178 ngut katba ki kynthei ki kham duna ban ïa ki shynrang bad ki don 4,07,867.
Lah ban pynkynmaw ba ha ka ilekshon ha u snem 2019, na ka Shillong Parliamentary Constituency, u Bah Vincent H Pala na ka Congress, u la long u lahduh ha kaba u la tam da haduh 1,52,443 ‘vote’ ïa u kyrtong uba wan ba ar na ka seng United Democratic Party (UDP), u Bah Jemino Mawthoh, katba na Tura, ka Agatha K Sangma na ka NPP ka la jop bad ka la tam da 64,030 ‘vote’ ïa u kyrtong ka seng Congress uba la wan ba ar, u Dr Mukul M Sangma. Ha kato ka ilekshon, u kyrtong ka BJP na Shillong, u Bah Sanbor Shullai, u la ïoh kumba 75,790 ‘vote’ katba u Rikman G Momin na Tura, u la ïoh tang 31,384 ‘vote’. Kane ka pyni ba ka BJP kam pat lah ban ïoh jingshaniah na ki paidbah ha kane ka jylla watla ka la jop kput ha ka ilekshon MP ha u snem 2014 bad 2019 ha kiwei pat ki bynta jong ka Ri.
Mynta, ka shong sa ha ki paidbah nongthep ‘vote’ ïano ba kin jied ha ka 19 tarik Ïaïong ban phah ïa ki arngut ki MP na Meghalaya sha ka Dorbar Lok Sabha. Lehse ki la don bun ngut napdeng ki 22 lak tam kiba la dep ban rai lypa naduh mynta ïano ban jied. Lehse ki dang don bun ruh ki bym pat rai ïano ki sngewbit ban phah sha Lok Sabha. Ka por ka dang don ban pyrkhat. Kaei kaba donkam ka long ban ïa mi paidbah ha katei ka sngi ban pyndep ïa la ka jong ka kamram bad ka hok ban jied nongmihkhmat. Kam myntoi ban shu shong ha ïing bad ban ym leit thep ‘vote’, hynrei ban pynlut por pat baroh san snem ban khñium ba kita ki MP kiba la shah jied ki long ki bym da biang. Kan bha shibun lada baroh ki ïa mih ryntih ban pyndep ïa la ka kamram.
Ngi kyntu ïa ki nongthep ‘vote’ ba kin leit ban sngap ïa ki kyrtong bad ki nongïalap ilekshon ki seng saiñpyrthei khnang ba kin sngewthuh kham bha hashwa ba kin rai ban kyrshan ïano-ïano. Ka jingpynshong nongrim halor ki mat ki jura bad ki jutang ba la khlei da ki kyrtong ka long kaba donkam shikatdei hashwa ba ngin rai ïano ngin jied bad ïano ngin kyntait. Ka jingkyntu ka long khamtam eh ïa ki paidbah nongthep ‘vote’ ka Shillong Parliamentary Constituency kiba kham leh kiar ban ïa mih ha ka sngi thep ‘vote’. Ngi ïoh ïa ka lad ban jied ïa ki MP/MLA/MDC tang shisien ha ka shi snem, bad lada ngi pynlehnohei ïa kata, kan long ka jingbabe kaba ngin hap kit tad haduh ban da wan biang ka ilekshon bathymmai. Namarkata, sngewbha ban ïa mih paidbah ha ka 19 tarik Ïaïong khnang ba kan ym don ka jingbabe hadien habud.
