Shillong, Lber 29
Ka SDO jong ka Sohra Civil Sub-Division ka la pynjari da ka kyndon 144 CrPC ha baroh kawei ka Sub-Division hadien ba la lap ïa artylli ki metïap na Ichamati bad Dalda ha ka 27 tarik Lber.
Ha u kyrwoh khubor, ka SDO, ka Saloni Verma, IAS, ka la ong ba na ka liang ki bor ba dei khmih, ki dang don ka jingsngew sheptieng halor ka jinglong shngaiñ bad namarkata, la donkam ban shim ïa ki lad ki lynti ban ïada ïa ka jingduh jong ki mynsiem briew bad ban pynneh ïa ka shongsuk.
Namarkata, ka la hukum ba naduh ka 28 tarik Lber, la pynjari da ka kyndon 144 CrPC ha kaba la mana ban pynlong ïa ka jingïalum paidbah/jingïalang jong palat saw ngut ki briew ha kano-kano ka jaka kaba dang hap hapoh ka Sohra Civil Sub-Division.
Hynrei ka Verma ka la ong ba la shah tang ïa ki jingïalang kiba ïadei bad ka ilekshon MP Lok Sabha 2024, bad kita ki dei ban long kiba la ïoh jingbit lypa.
Ha kajuh ka por, ka la mana ïa ki briew ba kin rah ïa kino-kino ki tiar pynmynsaw, hynrei kane kan ym treikam ïa ki bor pahara.
Shuh shuh la mana ïa baroh ki nongshong shnong ka Sohra Civil Sub-Division ba kim dei ban ai ïa kino-kino ki jingkren ne jingpyrta ne jingthoh da kaba kren ne thoh ne da kiwei pat ki lad kiba lah ban wanrah ïa ka jingïakynad lane kiba ktah ïa ka jinglong ha ka shongsuk shongsaiñ.
Nalorkata, ka SDO ka la khang ïa ki paidbah ba kin pyndonkam ïa ki kor ki bor kum ki tynghung ha ki kali ne ki ïing sah ne ki jaka paidbah lait noh sa tang ynda ki la ïoh jingbit.
Ka SDO ka la kyntu ïa baroh ki nongshong shnong, nongïalam shnong bad kiwei ba kin bud ïa kane ka hukum bad ban ai ïa ka jingïatreilang bad ki bor pahara khnang ban lah ban pynneh ïa ka shongsuk-shongsaiñ ha ka thaiñ.
Kane ka hukum kan treikam mardor tad haduh ban da pynbna da kumwei pat. Kino-kino kiba leh pyrshah kin shah pynshitom katkum ka kyndon 188 jong ka Indian Penal Code (IPC).
