Shillong, Lber 29
Ka kyrtong jong ka National People’s Party (NPP) na Shillong Konstitwensi, ka Kong Ampareen Lyngdoh, ka la kular ba lada ki paidbah kin jied ïa ka ha kane ka ilekshon MP sha ïingdorbar Lok Sabha kan pynurlong ïa ka ktien Khasi, ban ïada ïa ka jinglong rit paid bad pynkhlaiñ ïa ki riti-dustur lyngba ki District Council.
Ka Kong Ampareen ka la pynpaw ïa kine kyntien haba ka pan jingkyrshan na ki paidbah ha ka jingïalang ha Mawlasnai ha ka 28 tarik Lber ha ka jingïadonlang u MLA barim ka Sohïong konstitwensi, Bah Samlin Malngiang, Bah Ngaitlang Dhar bad nongkitkam ka NPP.
Ka Kong Ampareen ka la ong ba ka long kaba donkam ka jingïadei kaba jan hapdeng ka Sorkar Jylla bad ka Sorkar Pdeng khnang ban pynlah wanrah ïa ki skhim pynroi ïa ki paidbah.
Ka la ong ruh ba ka jingïakhun ka jong ka ïa ka ilekshon MP ka long ban wanrah ïa ki mat kiba bun kum ki MP kim shym la leh ha kine ki snem.
Ka la kular ban nym shah ïa ka Sorkar India ba kan pyntreikam ïa ki aiñ ban pynthut ïa ki rit paid, hynrei ka la wer ïa ki paidbah ban long kiba ïatylli ban wanrah ïa ka jingkylla. Ka la kular ruh ba lada ka jop kan long ruh ha kajuh ka por ka MP bad kan peit ruh ïa ka Mawhati namar ka NPP ka khlem don MLA ha kane ka konstitwensi.
Shuh shuh ka la ïathuh ba ka la ïoh shibun ki jingkyrpad na ki paidbah, hynrei kam lah ban kular namar ka don ka aiñ pyrkhing ilekshon ne ‘model code of conduct’.
Katba u Bah Samlin Malngiang u la ther tyngeh ïa u nongïalam ka Voice of the People Party, Bah Ardent Basaïawmoit namar u la kob ban ong ieid jaidbynriew tangba baroh ki mat kaba u la shim u khlem pynlut namar ki la sahkut mar shiteng.
U la ong ba kine ki mat ba sahkut ba la shim u Bah Ardent ka dei ka Clean Politic, ka MUDA, ka bhah thungkam bad ka Lokayukta kaba khlem poi shaei-shaei haduh mynta. U la ong ba une u nongïalam ka VPP u dei uba la rung sha ka UDP, HSPDP, Congress bad mynta u la poi sha ka VPP.
