Guwahati, Lber:
U President jong ka seng Congress ha Tinsukia distrik u Pranab Baruah, u General Secretary barim jong ka APCC u Birinchi Neog, ki heh nongïalam jong ka seng Congress kiba kynthup ïa u Mahesh Moran bad u Thomas Baruah ki la leit ban pynïasoh bad ka BJP ha ka Sngi Ba-ar ha Dibrugarh.
Ha kane ka prokram jong ka jingpynrung dkhot hapoh ka seng la don ryngkat u Myntri Rangbah jong ka jylla u Himanta Biswa Sarma, u Myntri ka sorkar kmie, u kyrtong jong ka seng BJP ban ïakhun na ka bynta ka Dibrugarh Lok Sabha konstitwensi, u Sarbananda Sonowal, u Myntri ka sorkar kmie u Rameswar Teli bad kiwei pat ki nongbud jong ka seng ha ka shlem treikam ba shipor jong ka District Election jong ka seng BJP ha Kasaribari, Lakhinagar ha Dibrugarh ha ka sngi Ba-ar. Ki la don shuh sa kumba 12 ngut ki nongïalam jong kiba bun ki seng kiba la leit ban pynïasoh bad ka seng BJP.
