Shillong, Lber 29
Ka jingleh shiliang khmat ka tnat ïalehkai jong ka Sorkar Jylla ka la paw tyngkreiñ sa ha ka kynhun ki nongjngi da kaba pynjah klep noh ïa ka baibam ne ka scholarship kaba ki dei hok ban ïoh.
Kane ka jingleh shilliang khmat ka la paw ba na kajuh ka kynhun kaba don saw ngut ki nongjngi ki la khur takma rnong ha ka jingïakop jngi jong ka Mixed Relay jong ka 2nd North East Olympic Games 2022 kaba la long ha kane ka nongbah Shillong. Hynrei, napdeng kine tang ar ngut kin sa ïoh ïa ka pisa kaba mar T.5000, katba kiwei pat ki la shah pynduh bad la shu pynjah klep noh ïa katei ka song jingïarap.
Kine ki khynnah kiba na ka shnong Shella ki ban sa ïoh ïa katei ka khusnam pisa na ka tnat ïalehkai ki long ka Pdiangsuklang Syngwan bad u Banpynshngaiñ Syngwan, katba ka Larisuk Youroi bad u Rangkynsai Myrthong kim shym la ïoh eiei.
Kat kum ka shithi kaba la phah sha kitei ki khynnah (Pdiangsuklang bad u Banpynshngain Syngwan) ba ïa ka pisa kaba mar T.5000 yn sa phah sha ‘account’ jong ki naduh ka 1 tarik u Ïaïong 2024. Kane ka pisa ba pyllait da ka tnat ka hap hapoh ka Scholarship Scheme.
Kane ka jingshah leh shiliang khmat ha ka tnat ïalehkai ka la paw hadien ar sngi ba ka synjuk ïalehkai hapoh ka shatri jong ka Meghalaya School of Martial Arts ki la pynpaw ka jingbynñiaw halor ka jingpynsahteng ban pyllait ïa ki khusnam pisa sha ki khynnah ïalehkai kiba la khur jingjop ha ki lympung ïalehkai bapher bapher na ka bynta u snem 2022-23.
Wat la kitei ki khynnah ïalehkai kiba na ka shnong Shella kim shym la ïoh ban kilanmet ha ki pung jngi kaba paka bad ki la hap ban kilanmet ïalade ha wah, pynban ki dang lah ban pynpaw ïa ki sap ba kyrpang da kaba khur takma ha ka North East Olympic Games bad mynta ki dang ïai pynkhreh ban leit shim bynta ha ki lympung ïakob bapher bapher.
“Lada ka tnat ïalehkai jong ka Sorkar Jylla ka dangleh shilliang khmat ha ka ban sam ïa ki song jingïarap sha ki khynnah ïalehkai, kan long ka jingpynduh mynsiem ïa kiba bun ki nongïalehkai kiba don ïa ka mon ban trei shitom na ka bynta ban nang ïai kiew shaphang ha ka kam ïalehkai jong ki,” la pynpaw uwei na ki nongïalam kane ka kynhun na Shella u Bah Komen Laitmon ha u nongthoh khubor.
