Haflong, Lber:
Ka lyer kaba jur bad ka jinghap jong u phria ka la pynjulor ïa ki spah tylli ki ïing jong ka shnong Wajao, Langgaobra, Langgaokro, Kaotaibari, Khepre (1) Khepre (2) Koladisa, Daobilipdisa, Prasadimidik, bad Bongkai jong ka Dima Hasao ha ka sngi Ba-ar.
Ki la don kumba 70 haduh 80 tylli ki ïing jong kawei kawei ka shnong kiba la shah pynjulor, ki lyngkha kba bad ki jingri ruh ki la shah ktah jur ha kane ka jingthombor jong ki bor ka mariang kaba la jia naduh ka por 2:30 jong ka step Sngi Ba-ar. Ka jinghap jong u phria bad ka jingbeh jong ka lyer kaba jur ka la sdang ban duna hadien khyndiat kynta.
Kiba bun ki briew jong kine ki shnong kiba la shah ktah jur ki la hap ban mih noh bad phet ban ïoh jaka rieh sha kiwei pat ki jaka. Ha kaba ïadei bad kane ka jingjia, ka la don ka jingkyrpad ïa ki bor ba dei khmih ba ki la dei ban ai ki jingïarap bad ki jingkyrshan sha kine ki lanot kum ha kane ka por kaba ki ïakynduh jingeh.
