Itanagar, Lber 29 (UNI)
Kumba la long ha ka risol ilekshon ba la dep, ka Jylla ha thaiñ Shatei Lam Mihngi, ka Arunachal Pradesh ka long kaba la khreh ban sakhi ïa 7 ngut ki kyrtong ka Bharatiya Janata Party (BJP), ba kynthup ïa u Myntri Rangbah, u Pema Khandu, ban poi sha ka thong khlem kano-kano ka jingïakhun pyrshah sha ka ïingdorbar thawaiñ ba 11 jong ka Arunachal Pradesh.
Hadien ka jingkhmih bniah ba pura ïa ki kyrteng kiba la dep thep na bynta baroh 60 tylli ki konstitwensi, ba kynthup ïa ka jingpynsangeh ïa ka jingkhmih bniah ïa ki kot ki sla ba la leh na bynta ka Itanagar bad Daporijo hynne ka sngi, la lap ba ki don 7 ngut ki kyrtong ka BJP kiba la thep kyrteng ki ban ïakhun ïa ka ilekshon khlem ki nongïakhun pyrshah, bad lehse la lah ban rai shah jied ïa ki khlem ki nongïakhun pyrshah hadien ba ka tarik bakhatduh ban weng kyrteng, la ong u Joint Chief Electoral Officer, u Liken Koyu. Nalor u Khandu, uba la pynkhreh ban ïoh ïa ka jingjop na Mukto konstitwensi ha Tawang, sa 6 ngut kiwei pat ki kyrtong ka BJP ki ban ïaid suk ïa ka lynti ban poi sha ka thong ki kynthup ïa u Techi Ratu na Sagalee bad Hage Appa na Ziro-Hapoli, MLA – Jikke Tako na Tali, Nyato Dukam na Taliha, Mutchu Mithi na Roing, bad Techi Kaso na Itanagar konstitwensi.
U Joint CEO, ha kawei ka liang, u la ïathuh ba hadien ka jingkhmih bniah ïa ki kot ki sla, baroh ki don 174 ngut ki ibit ban ïakhun ha kane ka ilekshon ban wan ba kynthup ïa 6 ngut ki ban leit sha ka ilekshon khlem ki nongïakhun pyrshah – ki la neh ha ka thup ïakhun na bynta ka ilekshon ha ka 19 tarik u Ïaïong.
Haba phai sha ka Itanagar konstitwensi , u Koyu u la ong, ka jingthep kyrteng jong ki MLA – Techi Kaso bad Techi Nhagu, kiba na BJP – la lap ba ki long kiba ibit hadien ka jingkhmih bniah hynne ka sngi bad bynrap ba u Nhagu u la hap weng kyrteng noh na Kaso ban shah jied khlem ka jingïakhun pyrshah.
Ki kyrtong kiba ibit ki kynthup ïa 62 ngut na BJP (ba kynthup ïa 2 ngut ki ‘substitute’), 24 ngut na ka Indian National Congress (INC), 16 ngut na ka Nationalist Congress Party (NCP), 24 ngut na ka National People’s Party (NPP), 13 ngut na ka People’s Party of Arunachal (PPA), 4 ngut na Arunachal Democratic Party (ADP), bad mar iwei-iwei na ka LJSP bad LJP, lem bad 29 ngut ki kyrtong shimet.
Ka Arunachal Pradesh kan ïoh ïa 2 tylli ki ilekshon ha ka 19 tarik u Ïaïong ban jied thymmai ïa ka ïingdorbar ki 60 ngut bad 2 ngut ki MP sha ka Lok Sabha ba kynthup ïa ka Arunachal West bad East.
Haba phai sha ka ilekshon Lok Sabha, la shem ba 14 ngut ki kyrtong ki long kiba ibit na bynta kitei ki 2 tylli ki konstitwensi hapoh ka Jylla hadien ka jingkhmih bniah ïa ki kot ki sla ha ka Sngi Palei.
Haba phai sha ka Arunachal West Parliamentary konstitwensi, ki don 8 ngut ki kyrtong ba kynthup ïa u Myntri ka Sorkar Pdeng bad kyrtong ka BJP, u Kiren Rijiju, Nabam Tuki – INC bad Toko Sheetal jong ka Gana Suraksha Party, lem bad 5 ngut ki kyrtong shimet – Ruhi Tagung, Bimpak Siga, Tania June, Leki Norbu bad Techi Rana.
Katba ha ka Arunachal East Parliamentary konstitwensi, ki don 6 ngut ki kyrtong ba kynthup ïa u Tapir Gao jong ka BJP, Bosiram Siram – INC, Bandey Mili na ADP, bad 3 ngut ki kyrtong shimet – Omak Nitik, Sotai Kri, bad Tamat Gamoh ki ban ïa aireng ha ka ilekshon hadien ba ki kot ki sla jong u kyrtong shimet, u Techi Rana ki la shah kyntait hadien ka jingkhmih bniah hynnin ka sngi.
