Shillong, Lber 29
Ka Dorbar Shnong Mawlai Syllaikariah ha ka 28 tarik u Lber ka la rai ban ‘boycott’ ne kyntait na kaba leit ïashim bynta ha ka ilekshon MP sha ïingdorbar Lok Sabha ha ka 19 tarik u Ïaïong.
Haba ïoh ban ïakren bad ki nongkitkam shnong kiba kynthup ïa u Rangbah Shnong bad u Assistant Rangbah Shnong, ki la ong ba kane ka jingshim ïa kane ka rai ka long hadien ka jingleh bym suitñiew jong kiba nalor khamtam ïa ka sorkar ka bym shym la sngap ïa ki jingkyrpad jong ka shnong na ka por sha ka por ban maramot ïa ki surok shnong bad ki lynti shnong, kiba ka tnad PHE ka la pynjot bad shu ieh khongreng hadien ka jingwan tih ban thep ïa ki pipe um mynta la palat shisnem tam eiei.
Ki nongkitkam shnong ki la ong ba ka shnong ka la pynlut da ka pisa jong ka shnong ban shna ïa ki lynti ïaid kjat, hynrei ka tnat PHE ka la wan tih ïa ki surok bad ki lynti ïaid kjat ha shnong khlem da wan ban pynbha biang. Kane ka wanrah ïa ka jingshong syier ïa ki paidbah khamtam ïa kiba ïaid ba ïeng namar bun kiba ïaid ki la ur khamtam ha ki bynta ba long thliew.
Ki la ong ruh ba na ka liang ka shnong ki la leit ban pan jingïarap na u nongmihkhmat, hynrei ka long lehnohei namar u nongmihkhmat u la ai jingmut ban leit buh da ka FIR, hynrei na ka liang ka shnong kam lah satia ban leh ïa kata.
Ki la ïathuh ruh ba bunsien ki la leit ban kyrpad na ka tnad PHE ha ryngkat ki jingthoh wat la katta ki la dep ban ujor ruh lyngba ka ‘online’ sha ka ‘Grievances Cell’ ka sorkar, hynrei ki khlem ïoh ïa kano-kano ka jubab.
Na ka liang ka Executive Committee ka shnong ka la rai ba lada kim sngap ïa kane ka jingud-jingnam ha shwa ka ilekshon, ka shnong kan nym ïashim bynta ha kane ka ilekshon MP ka ban sa long ha ryngkat ka jingïatreilang bad kiba bun ki nongshong shnong.
“Da ka mynsiem kaba sngewkhia ba ngim ïoh ka jingïarap wat la ngi lah leit sha ka tnad bad ngi la pan jingïarap nano-nano ruh ngim ïoh, kumta ka EC da kawei ka jingmut-jingpyrkhat hi, ngi la ïakut jingmut bad ngi la rai skhem ba ngin nym ïashim bynta bad ngin shu ‘boycott’ beit ïa kane ka ilekshon MP”, la ong kitei ki nongkitkam shnong. Shuh shuh kitei ki nongkitkam shnong ki la rai ruh ba lada ka sorkar kan pynlong ïa kane ka ilekshon MP, ka shnong kan nym khang ïa kata hynrei kan nym don satia ïa kano-kano ka jingkitkhlieh ha kaba ïadei bad kane ka ilekshon namar ba ha ka por ilekshon, la ïohi ba ka sorkar ka ju khynñiat ïa ki kam sha ki nongpynïaid shnong ban peit na ka bynta ka jingïaid beit ïaid ryntih bad ka shongsuk-shongsaiñ.
“Ha kito ki ilekshon baroh kiba la dep, ngi ïashim bynta miet la bad sngi haduh ban da kut ka ilekshon ban pynïaid beit ïa ka ilekshon khlem kano-kano ka jingkulmar hynrei mynta te ngi la ïa raikut hi ba lada ka sorkar lane na ka liang jong ka tnad kam leh eiei shwa kane ka ilekshon MP, ngi la kut jingmut ba ngin nym ïashimbynta dalei-lei”, la ong kitei ki nongïalam shnong.
Na ka liang u Bah A. Kharkongor uba dei u Rangbah Shnong u la ong ba ka Mawlai Syllaikariah ka dei ka shnong kaba la shah lehbeiñ naduh mnshwa ha ka roi ka par na ka bynta u paidbah nongshong shnong.
“Ka shnong Syllaikariah jong ngi ka la shah lehbeiñ ym dei tang ha kane ka khep kaba mynta. Kaba bun ka roi ka par ki dei ban leh naduh ki MLA kiba rim, ngi lah leit mih sha ki bad ban shu ong noh, ngi lah dem ha ki kjat bad ngi lah kyrpad na ka bynta ban pynbha ïa ki lynti bad ki surok shnong hynrei kam don ka jingseisoh”, la bynrap u Bah Kharkongor.
Nalorkata, u Rangbah Shnong u la pynpaw ruh ïa ka jingkyrduh ka umbam-umdih hapoh ka shnong kaba la buh jingeh shikatdei eh ïa ki nongshong shnong.
“Ki lehbeiñ ïa ngi bad ki lehbeiñ ïa ki nongshong shnong jong ngi, kim peit bad kim salia. Ngi la kyrpad hynrei ki la sngap jar-jar bad ynda ngi la phone sha kito kiba peit, ki la pynlip ïa ki phone jong ki bad kane ka long kaei-kaei kaba sngewsih haba ïohi ba kum kine kiba peit ïa ka bha ka miat na ka bynta jong ngi ki nongshong shnong ki leh kumta ïa ngi, kumta ngim banse ba ha kane ka sien kaba mynta ban sangeh ka jingshim bynta ha ka ilekshon bad kam don jingmyntoi ba ngin ïashim bynta ha ka ban ïa leit thep vote”, la ong u Bah Kharkongor.
