Nongstoiñ, Lber 29
Ka Blue Bomber’s ka la jam sha ka final ha ka Invitation Knockout Football Tournament 2023-24 ba la pynlong da ka New Nongstoiñ Sports Social & Cultural Club, hadien ba ka la lah ban pynliem noh ïa ka Shillong Lajong FC da 2-1 kol ha ka semi final (2nd Leg) kaba la long ha ka Sngi Palei ha madan New Nongstoiñ.
Lah ban kdew hangne ba ha ka jingïalehkai semi final (1st Leg) ka Blue Bomber’s ka la ïoh ban khur ïa ka jingjop da kaba pynliem noh da 4-3 kol ïa ka Shillong Lajong. Haba phai pat sha ka wat kaba ar, ka Blue Bomber’s ka la pynliem biang da 2-1 kol ïa ka Shillong Lajong.
Kumta lyngba kane ka jingjop haba kheiñ ha ka ‘aggregate’ ka Blue Bomber’s ka la lah ban tam da 6-4. Lyngba kane ka jingjop ka la pynlong ïa ka Blue Bomber’s ban ïoh ban rung syndon sha ka final. Ïa ka nam Man of the Match la ïoh ban khur da u rang-apkol jong ka Blue Bomber’s u Ban Kharsyntiew.
