Washington, Lber:
Katkum ki khubor, la ong ba ka jingiadei hapdeng u President ka US- u Joe Biden bad u Myntri Rangbahduh ka Israel- u Benjamin Netanyahu ka la sdang ban synjor noh ha ka Lah Sngi U Blei hadien ba ka US ka la ailad bad mynjur ia ka jingdawa ban pynsangeh noh ia ka thma Israel hapoh Gaza ha ka jingshim rai ba khatduh jong ka United Nations ha katei ka sngi namar ka jingeh kaba la wanrah ia ki paidbah nongshong shnong ka Gaza ha kane ka por.
Kumta, la ong ba u Netanyahu ruh u la pyndam noh ia ka jingthmu leit jngoh sha ka nongbah Washington jong ka United States kaba la pynbeit ban long ha kane ka taiew. Kumta tang namar katei ka jingshim rai jong ka US ha kane ka sien ka la pynlong ia utei u nongialam ka Israel ba un pyndam noh ia katei ka jingleit jngoh jong u sha US namar ka jingai jingkyrshan jong ka US ia ka jingdawa ban phah sangeh noh ia ka thma hapoh ka nongbah Gaza jong ka Palestine.
Shuh shuh ruh la ong ba katei ka jingiapher jingmut bad jingsngew jngai hapdeng kitei ki nongialam jong kitei ki arliang ri ha kane ka sien, ka la wanrah pat ia ka jingma ioh ka Israel kam pynsngap ia katei ka jingdawa ban sangeh thma hapoh Gaza bad ka la wanrah ruh ia ka jingkylli hato ka US lane u Biden, kin dang ai jingkyrshan ne em pat ia ka Israel lada ka Israel kan iai bteng ia katei ka thma pyrshah ia kitei ki lehnoh Hamas jong ka Palestine kiba la synshar ia ka nongbah Gaza mynta da ki phew snem.
Kane ka pyni ruh ia ki dak- ki shin ba ka jingiadei hapdeng ka sorkar US bad ka sorkar Israel ka lah ban kheiñ ne tlor noh namar katei ka rai jong ka US ha kane ka taiew kaba la pynduh jingshaniah noh na ka Israel, kaba la shaniah tylli ha ka US namar kumba la iohi hi naduh ba sdang jong ka jingleit hiar thma bad ka jingleit kput jong ka Israel ia ki lehnoh Hamas ha Gaza, dei ka US hi kaba leit ban ai jingkyrshan bad pynshlur ia ka Israel ba kan leit pynhiar kput ia kitei ki lehnoh kumba ki leh ia ka Israel ha u Risaw jong u snem ba la leit.
La ong ruh ba ka rai jong ka sorkar Biden ha kane ka sien ka la pyn kyndit ia ka Israel namar baroh shi katta u Biden bad ka sorkar jong u, kim ju ai jingkyrshan ne mynjur ia ka jingdawa jong kiwei pat ki ri ne ki tnat bapher ban phah sangeh noh ia ka thma jong ka Israel.
Hynrei ha kane ka sien pat, ka US ka la mynjur ban ia tylli lang bad kiwei pat ki tnat bad ki ri bapher ban dawa ia ka Israel ban sangeh noh syndon ia katei ka thma.
