Noida, Lber:
Ki la don palat 12,200 ngut ki nongñiah kali ar shaka kiba la shah pynshitom halor ka jingpynkheiñ jong ki ïa ki kyndon ha ka sngi ba la don ka jingrakhe ïa ka Holi ha kylleng ki bynta jong ka Noida bad Greater Noida, la ïathuh ki pulit ha ka sngi Ba-ar.
Na ki Challan ba la dep ban ai, ki la don kumba 8,110 tylli ki jingjia kiba dei halor ka jingbym deng ïa ki Helmet haba ñiah ïa ki kali ar shaka bad 372 tylli ki dei ki bym deng ïa ki Seat Belt. Sa 906 tylli ki Challan ki dei kiba la ai na ka bynta kito kiba shong lai ngut ha ki kali ar shaka, ki la ong.
Ïa ki Challan la ai ruh ha kaba ïadei bad ki 82 tylli ki jingjia halor ka jingpyndonkam ïa ki Mobile Phone katba dang ñiah kali ha ki surok, 402 tylli ki dei halor ka jingpynkheiñ ïa ki kyndon No-Parking, 633 tylli kiba ñiah kali ha ki bynta bym dei jong ka surok, 337 tylli na ka bynta bymbiang ki Number Plate bad 441 tylli ki dei ba la ñiah ïa ki kali ha ka por ba ai Red Light, la ïathuh ka jingthoh ba la phah.
Ki pulit ki la ong ruh ba la pynlong ruh ïa ki jingpynsngewthuh paidbah hapoh ka jingpynïaid jong u Deputy Commissioner of Police (Traffic) u Anil Kumar Yadav ha ka sngi ba la rakhe ïa ka Holi.
“Kum shi bynta jong ka jingïalang pynsngewthuh paidbah, ki la don ruh ki jingkhmih bniah ba la leh ha ki 44 tylli ki jaka kiba don ha Noida bad Greater Noida. Ha ka por ba ka la don ka jingleit khmih bniah, la pynshitom pyrshah ïa 67ngut ki briew ha kaba la lap ba ki la ñiah ïa ki kali ha ka por ba ki la dih buaid bha. Ka jingpynshitom pyrshah ïa kine ki briew ka kynthup ruh da ki E-Challan, ka jingkurup ïa ki kali bad kiwei pat,” la ïathuh shuh shuh ki pulit.
Sa kumba 172 tylli kiwei pat ki kali ar shaka ki dei kiba la ïohbat naba kim don ïa ki Licence, 306 ngut ki briew la lap ba ki la pynher sted ïa ki kali bad ki trai jong ki 79 tylli ki kali ki la shah daiñ kuna namar ka jingpynmih ïa ki jingsawa palat, 32 tylli ki dei kiba la pynjaboh ïa ka lyer bad 412 ha kaba ïadei bad kiwei pat ki bynta jong ki jingpynkheiñ aiñ, la ong ka jingthoh.
