Shillong, Lber 29
Ka lahduh jong ka aïom ba la dep, ka Mawlai SC ka la wanphai da ka jingjop kaba nyngkong eh ha ka Shillong Premier League 2023 hadien ba pynliem noh ïa ka Langsning FC da 1-0 kol ha ka sngi Palei ha SSA Stadium, Polo.
Kane ka nam jop ka la wan urlong lyngba u Dajiedlang Wanshnong na ka bynta ban khur ïa ki lai point.
Ha ka jingïalehkai ba la lah, ka Mawlai ka la lah ban pynïakhaid mar 1-1 kol pyrshah ïa ka Ryntih, katba ka Langsning ka la shah rem ha ka Shillong Lajong da 3-2 kol.
Kumba ka paw ka Mawlai bad ka Langsning ki la ïakylliang ïa la ki coach ha kaba u Khlaiñ Pyrkhat Syiemlieh u la shimti ïa ka Langsning bad u Bah Hering Shangpliang u la ïalam ïa ka Mawlai.
Ha kane ka jingïakhun ka Mawlai ka la ïakhun tyngeh naduh kaba sdang ha kaba ka la ïoh ban pynkhih jar nyngkong eh lyngba u Dajiedlang (10′), uba la ïoh ban shut na kyndong bad u rangapkol ka Langsning um shym la lah ban kyrda na ka jingshah thep.
Hadien katto-katne por ka Langsning ka la ïoh ïa katto-katne ki kabu kiba biang lyngba ka free-kick ba la shut da u Overkindness L. Mawnai ha kaba ka bol ka la her shabar bad kumjuh u Nelson Rymbai, hynrei kine baroh kim shym la urlong satia.
Shiphew minit shwa ban kut ka jingïalehkai jong ka kylla step ka Langsning ka la ïoh ïa ka kabu kaba biang lyngba u Kitboklang Pale, hynrei ka la paw shai ba ka dei ka ‘offside’. Hadien la ïoh biang sa u Maxderidoff Wahlang, uba la ïoh ban shut najngai, hynrei la shah khanglad noh ha ki rangïalehkai ‘dien.
Kine baroh ar ki kynhun ki la bteng ban ïakhun tyngeh ha ka kylla miet, ha kaba ki la ïoh ïa katto katne ki kabu kiba biang. U Donlad Diengdoh u la shah pynur hapoh ‘box’ ha u rangïalehkai ‘dien ka Langsning u Ambilstar Sun bad dei hangne ba ka Mawlai ka la ïoh da ka penalty.
Kane ka kynhun ka la ïoh ar sien ban shut ïa ka penalty hynrei kam shym lah urlong. U Fullmoon Mukhim u la ïoh ban shut nyngkong bad kam shym la rung na ka daw ka jingïashan tyngeh u rangapkol ka Langsning u Surjay Kumar Pariyar. Hynrei na ka liang u assistant referee u la kdew ba u rangapkol ka Langsning u la mih shabar u laiñ ha ka por ba shut ïa ka penalty bad kumta la ailad biang ïa ka Mawlai ban shut ïa ka penalty, hynrei u kapten ka kynhun u Brolington (Bro) Warlarpih u la pynlehnohei ïa kane ka kabu ksiar.
Hashwa ban wai ka Langsning ka la pyrshang ban ïakhun tyngeh ban pynïakhaid, hynrei u Sheen Stevenson Sohktung um shym la lah ban pynurlong na ka daw ka jingïashan tyngeh ki rangïalehkai ‘dien ka Mawlai bad ha kaba kut ka la hap ban mad ïa ka jingshah rem kaba ar ha kane ka lympung.
Lyngba kane ka jingjop ka Mawlai ka la kamai 4 point na ka bynta ban don ha ka kyrdan balai kata hadien ïa ka Shillong Lajong bad ka Rangdajied United, kiba don ha ka kyrdan ba nyng-kong bad ba-ar.
Ka jingïakhun ha ka sngi Saitjaiñ kan long hapdeng ka Nongthymmai SC pyrshah ïa ka Ryntih ha ka por 3 baje janmiet.
