Shillong Lber 29
Ka jingtohkit halor jingshah pynïap jong ar ngut ki briew ha thaiñ Ichamati ka dang ïaid shakhmat na bun ki liang bad ki pulit kim lap ksai la ka jingjia ka don jing-ïadei ne em bad ka jingïalang pyrshah Citizenship Amendment Act (CAA).
Na ka liang u Superintendent of Police (SP) ka East Khasi Hills district, u Rituraj Ravi, u la ong ba ïa mynta um pat lah ban batai namar ka jingtohkit ka dang ïaid shakhmat na baroh ki liang.
“Ka jingtohkit ka long na baroh ki liang halor kane ka kam runar kaba shyrkhei ban lap ïa ki runar kiba leh ym ban pynïadei ïa ki nongleh kam sniew bad kano-kano ka seng ne kynhun hynrei ka dei beit ïa ki runar shimet kiba donkti,” la ong u SP.
U SP u la ïathuh ba kan don ruh ka jingtohkit da u majistor haba ïadei bad kane ka jingjia.
Ïa ka met jong kine ar ngut la aiti sha ki bahaïing ha ka Sngi Thohdieng namar ïa ka postmortem la lah ban pyndep haduh ka por mynmiet jong ka Sngi Palei bad la pyndep ïa kaba sah ha ka Sngi Thohdieng.
Haba ïadei bad ka jinglong-jingman ha thaiñ Ichamati, u SP u la ong ba la pynjari ïa ka kyndon 144 CrPC bad la phah shuh shuh ïa ki pulit pahara kum ka jingwanrah ïa ka jingshngaiñ ïa ki paidbah nongshong shnong.
U SP u la ïathuh ba ki pulit ka Shella Outpost ki la ïoh jingtip ha ka por 5 baje janmiet eiei ha kato ka sngi ba ka don ka jingkulmar ha thaiñ Ichamati bad ynda ki pulit ki la poi ban pahara ha kato ka jaka, la lap pynban ïa ka met ïap na kawei ka jaka kaba jngai kumba 100 meter, bad ha ka lynti sha Mawlong la lap sa kawei ka met ïap. Ki ar ngut kiba la shah pynïap ki long u Esan Singh bad Sujit Dutta kiba dei ki nongtrei bylla ha ki par mawshun.
Ha kawei pat ka liang, ka tyllong khubor ka ïathuh ba ka jingtohkit ka dang ïaid ban lap ksai ïa ka daw jong ka jingshah pynïap kaba la jia lang ha kajuh ka sngi.
La ong ba ki pulit kim lap ksai la ka don jingïadei ne em ka jingjia bad ka jingïalang pyrshah CAA kaba la long ha Ichamati ha ka 27 tarik Lber.
Ka tyllong khubor ka ïathuh ba ki pulit ki dang tohkit na bun ki liang naduh ka jinglong-jingman ki kam khaïi-pateng ha thaiñ Ichamati namar ïoh don kano-kano ka daw shalyndet ha ki kam khaïi-pateng, nalor kane ka jingjia ka dei kaba la mang lypa ba kan jia ha ka sngi ba pynlong ïa ka jingïalang pyrshah CAA.
