Bengaluru, Lber:
U heh nongïalam jong ka seng Janata Dal (Secular) bad u Myntri Rangbah barim jong ka Karnataka u HD Kumaraswamy ha ka Sngi Ba-ar u la pyntikna ba un sa ïakhun ha ka ilekshon Lok Sabha ka ban wan na Mandya konstitwensi kum u kyrtong jong ka kynhun National Democratic Alliance (NDA).
“Mynta ka sngi ka rai jong nga ka long ban ïakhun na Mandya ha ka ilekshon ban wan. Ki nongïalam jong ka seng BJP ki la kyntu ïa nga ba ngan ïakhun na Mandya. Kiba bun na ki nongbud jong ka seng na Mandya ruh ki la pynshisha halor kane. Ngan sa phah ïa ka jingpynrung kyteng bad hadien kane ngan sa ïalap ilekshon ha ka jylla,” u la ong ha ka jingïakren bad ki nongthoh khubor.
“Ngi la pynïasoh bad ka kynhun synrop NDA halor ka jingthmu ban lah ban weng ïa ki jingeh jong ka Karnataka. Ha ki por ba la leit ngi la shah rem naba ngi la ïatreilang bad ka seng Congress. Ki nongïalam jong ka seng JD(S) bad BJP ki la ïasnohktilang bad sdang ban pynlong ïa ka jingïalap ilekshon ha ki konstitwensi kiba ha nongkyndong kiba don ha Bengaluru,” u la bynrap shuh shuh.
