Patna, Lber:
Ka kynhun NDA kan sa jop ha baroh 40 tylli ki Lok Sabha konstitwensi ha Bihar, la ong u Co-incharge jong ka seng BJP ha ka jylla u Deepak Prakash ha ka Sngi Balang.
U Prakash, uba long u President barim jong ka seng BJP ha Jharkhand, u la shah pynbna kyrteng ha ka seng ha ka thup kyrteng jong 40 ngut ki nongïalap ilekshon ba pawkhmat na ka bynta ka Bihar.
Ïa ka ilekshon sha 40 tylli ki Lok Sabha konstitwensi ha Bihar yn sa pynlong ha 7 tylli ki bynta, ka ban sdang naduh ka 19 tarik, Ïaïong.
“Ka seng BJP ha ryngkat ki seng ba la ïatreilang kin sa ïoh ïa ka jingjop ha baroh 40 tylli ki Lok Sabha konstitwensi ha Bihar ha kane ka por, bad kan sa kot sha ki 400 tylli ha kylleng ka ri bad kane kan sa ailad ïa u Narendra Modi ba un ïoh long Myntri Rangbahduh biang ha ka sien kaba lai,” la ong u Prakash, uba long u MP ha Rajya Sabha, ha kaba u la ong ruh ba shen yn sa pynbna ïa ka kyrteng jong u kum u nongïalap ilekshon ba radbah.
Kum shi bynta ban ai ka jingïarap ïa ka kynhun nongïalam jong ka seng kaba la buh ka jingshaniah ha u, u la ong ba ka seng BJP ka la pyni ïa ka dak na ka bynta ban wanrah ka jingjop.
Ka seng BJP ha ka Sngi U Blei ka la pynbna ïa ki kyrteng jong ki kyrtong ki ban ïakhun na ki 17 tylli ki Lok Sabha konstitwensi ha ka jylla.
Ka la pynhap noh ïa lai ngut ki MP ha kaba ka samoi treikam jong ki kan sa kut noh, kynthup u Myntri ka sorkar kmie u Ashwani Kumar Choubey.
