
Nongpoh, Lber 31
Ha kawei ka jingjia tyngkhuh kali ha ka janmiet Sngi U Blei, ar ngut ki briew kiba shong ha ka scooty kaba don ïa u nombor ML 05AB 5721 ki la khlad noh hashen hadien ka jingshah ïuh na ki bynta jong ka khlieh ha kawei ka trok kaba don ïa u nombor ML 11 8622 ha ka surok Umroi Bypass marjan bad ka Tyndai Resort.
Ka tyllong khubor na ki pulit ka Ri Bhoi, ka la ïathuh ba kane ka jingjia ka la jia ha ka por 3:30 janmiet katba katei ka ‘scooty’ kaba la ñiah da u Khrawbor Pakma na ka shnong Mynso, West Jaiñtia Hills lem bad uwei uba shong ryngkat ba la tip kyrteng kum u David Sajem na ka shnong Ioksi, West Jaiñtia Hills. Kine ar ngut ki dang thmu ban leit sha ki bynta jong ka Umïam, hynrei ynda poi ha katei ka jaka, da ka jingthmu ban jam shakhmat, ki la leit ban tynrah shwa ïa kawei ka Hyundai Eon kaba don ïa u nombor ML 05K 2600 kaba dang ïaid lang sha kajuh ka bynta.
La ïathuh ruh ba hadien ka jingleit tyngkhuh ïa katei ka kali Hyundai, katei ka ‘scooty’ ka la kyllon bad kitei ar ngut kiba shong ki la kum leit rung ha khrum jong katei ka trok kaba don shakhmat kat haduh ban da shah ïuh ha ka shaka dien jong ka trok bad lwet ki bynta jong ka khlieh baroh ar ngut.
Kumta ki bor pulit ki la pynkit noh ïa ka met kaba sah jong kitei ar ngut kiba la khlad hashen sha Nongpoh Civil Hospital na ka bynta ban pyndep ïa kiwei-kiwei ki jingdonkam katkum ki kyndon aiñ.