Shillong, Lber 31
Ka Gujarat Titans ka la lah ban pynliem noh ïa ka Sunrisers Hyderabad ha ka lympung Indian Premier League (IPL) 2024 da 7 wiket. Kane ka la wan lyngba ka jinglah ban ïalehkai bha u Sai Sudharsan bad David Miller.
Haba phai sha ka jingïalehkai kaba la long ha ka Sngi U Blei ha Narendra Modi Stadium, Ahmedabad ha Gujarat, ka Sunrisers Hyderabad kaba la jop ïa ka jingkynting pisa ka la kam trai ban tied nyngkong, da ka jingkyrmen ba kan lah ban tied kumba ka la tied ha ka jingïakhun pyrshah ïa ka Mumbai Indians.
Hynrei ha kane ka kynti, ki nongtied ka Hyderabad kim shym la lah ban bteng ïa kaei kaba ki la pynpaw ha ka jingïalehkai kaba la dep bad tang hadien ba ki la kamai 34 run na ki 4.2 over ki la duh noh ïa ka wiket ba nyngkong jong u Mayank Agarwal bad ka wiket ba ar jong u Travis Head ka la hap ha ka por ba la kamai 58 bad ka jinghap ki wiket ka la bteng. Kumta ha kaba kut jong 20 over, ka la lah ban tied 162 run bad hap 8 wiket, ha kaba ym shym la don satia ki nongtied kiba la kamai 30 ne palat ïa ka 30 run.
Haba beh ïa kane ka thong, wat la ki nongtied ka Gujarat ruh ki la duh ka wiket ba nyngkong hadien ba ki la kamai 36 run na ki 4.1 over hynrei ka jinglah ban ïalehkai bha jong u Sai Sudharsan uba la tied 45 run na ki 36 tylli ki bol, u David Miller uba la tied 44 run na ki 27 tylli ki bol bad u Shubman Gill uba la tied 36 run na ki 28 tylli ki bol, ka la pynlong ïa ka Gujarat ban lah pyndep ha ka over kaba 19.1 da kaba kamai 168 bad duh 3 wiket.
U Mohit Sharma jong ka Gujarat Titans uba la khur 3 wiket bad ai 25 run na ki 4 tylli ki over kiba u la kawang, u la ïoh ban khur ïa ka khusnam ‘Player of the Match’.
Lyngba kane ka jingjop, ka Gujarat Titans na ki 3 tylli ki jingïakhun, ka la kamai 4 point, kata ban jop 2 sien bad shah rem shisien bad mynta ka la don ha ka kyrdan kaba 4 ha ka miej ïakheiñ point katba ka Sunrisers Hyderabad ka la don ha ka kyrdan kaba 5 na ki 2 point ba ka dang ïoh khur, kata ban shah rem 2 tylli bad jop kawei.
