Nongpoh, Lber 31
Ka Dorbar Raid Nongpoh ha ka Sngi Saitjaiñ ka la lah ban pynlong biang ïa ka lehniam Shad Sajer kaba ishongkun bad kaba iphuh-iphieng ha u Lum Wortoh, kata hadien kumba 20 snem eiei ba khlem pynlong shuh ïa kane ka jinglehniam kaba kyrpang jong ki khun ki hajar ka Raid Nongpoh ban ainguh aidem ïa U Blei Nongbuh Nongthaw halor ki jingkyrkhu kyrdoh jong u ïa ki jingthung-jingtep jong ki khun ki hajar baroh shisnem bad ruh na ka bynta u snem u ban sa wan.
Ha kane ka sngi la wan ban ïashim bynta lang da u Bah Fredrick Kharkongor, Commissioner Secretary ka tnad Arts & Culture ka Sorkar Jylla kum u kongsan, ka Kong Patricia Mukhim, Editor jong ka kotkhubor phareng ‘The Shillong Times’, u Lyngdoh ka Raid Nongpoh, Bah Linus Lyngdoh bad kiwei-kiwei de ki nongïalam jong ki Raid bapher-bapher ka them Ri-Bhoi.
Lyngba kane ka jinglehniam Shad Sajer, ki paidbah ki la sakhi ïa shibun ki jingshad tynrai jong ki Raid bapher-bapher ka them Ri-Bhoi kiba kynthup ïa ka Shad Shut Wait, Shad Dong Dong jong ka Raid Nongpoh, ka Shad Krut Lyngkha jong ka Raid Sohkhwai, ka Shad Shut Wait bad Shad Mastieh jong ka Raid Nongkhrah, ka Shad Rah Kynthei jong ka Raid Nonglyngdoh bad ka Shad Domahi jong ka Raid Nongkharai.
Nalor kitei ki jingshad niam tynrai, ha kane ka sngi la pynlong ruh ïa ki jingïalehkai tynrai kiba kynthup ïa ka jingïatan tyllai bad jingïakob kiew siej kiba la wan ban ïashim bynta shit rhem da ki shnong bapher-bapher kiba hap hapoh ka jingkhmih jong ka Raid Nongpoh.
Kumban pynshai khyndiat, ki nongïalam jong ka Raid Nongpoh hadien ka jingwad bniah bad wad jingtip kaba tikna, ki la ïathuh ba kane ka jinglehniam ka dei kaba khlem pynlong shuh la kumba 20 snem tam bad ym laiphew snem kumba ki pyntip paidbah ha kine ki khyndiat sngi ba lah dep.
Haba ai jingkren ha kane ka sngi, u Bah Fredrick Kharkongor kum u kongsan u la pynpaw ïa ka jingsngewkmen ban sakhi ïa kane ka jinglehniam Shad Sajer jong ka Raid Nongpoh da kaba ai jingïaroh sha ki nongïalam jong ka Raid kiba la shimkhia ban pynim bad pynlong biang ïa kane ka jinglehniam kaba la sdang ban duhjait.
U la pynpaw ruh ïa ka jingkongsan jong ka jingpynlong ïa kane ka jinglehniam kaba ki paidbah bad khamtam eh ki khun samla ki lah ban ïohi biang hadien 20 snem ba khlem pynlong shuh ïa kane ka jinglehniam lehrukom ba shisien shisnem jong ki khun ki hajar ka Raid Nongpoh.
U la ïathuh ba ka tnad Arts & Culture ka dei kaba trei na bynta kumno ban pynshlur bad thaw ïa ki lad ki lynti ban kyntiew, ban pynim bad pynneh-pynsah ïa kine ki jingriewspah jong ka jaidbynriew khamtam bad kum shi bynta na kane, u la buh ka jingkyntu sha ki nongïalam jong ka Raid Nongpoh ba kin phah ïa ki jingthoh jong ki ban pynrung ïa kane ka jinglehniam Shad Sajer ha ka thup jong ki ‘Minor Festival’ jong ka Jylla bad pynpaw ba lehse ha ki snem ban dang wan shakhmat, lada kane ka jinglehniam Shad Sajer ka la nang heh bad nang ïar, ha kata ka por lehse yn lah ruh ban pynrung wat ha ka ‘Major Festival’ jong ka Jylla kumba long lem ka Shad Nongkrem, ka Shad Behdeiñkhlam bad ka Wangala.
U Bah Kharkongor u la pyntip ruh ba wat na ka liang jong ka United Nations Educational, Scientific and Cultural Organisation (UNESCO) ka don ïa ki lad jingïarap na ka bynta ban pynneh-pynsah bad pynim biang ïa kum kine ki jinglehniam tynrai kiba la sdang ban duh jait.
Na ka liang ka Editor jong ka kotkhubor ‘The Shillong Times’, ka Kong Patricia Mukhim haba ai jingkren ha kane ka sngi kum ka symbud kongsan ka la ong ba lyngba kine ki jinglehniam lehrukom, la ïoh shibun ki jingtip kiba lehse ym ju kham tip kaba kynthup naduh ki jingshad, jingrwai bad phawar tynrai bad ruh wat ha ka jingïadei shi kur shi kha.
Ka Kong Mukhim ka kyntu ruh ba ym dei ban wahrah ïa ka niam ha kum kine ki jingpynlong ïa ki jinglehniam tynrai da kaba ong ba kane ka dei ka kolshor bad ka jingïadei para briew ha ka Bri U Hynñiewtrep katba ka niam pat ka dei ka jingïadei shimet bad U Blei.
