Nongpoh, Lber 31
Ka Jylla ha ka Sngi Saitjaiñ ka la ïoh ban sakhi ïa ka jingplie thymmai ïa kawei ka jaka ai jingsumar kaba paka na ka bynta ki nongpang ha shnong Mawsmai, Ri-Bhoi District, ïa kaba la tip kyrteng kum ka ARHI Multi Super Speciality Hospital. Ïa kane ka hospital kaba thymmai bad kaba kot kyrdan kumba long lem kiwei de ki jaka ai jingsumar ha ki nongbah kiba heh jong ka ri la wan ban plie paidbah da u Bah A.L. Hek, Myntri ka tnad Animal Husbandry & Veterinary ka Sorkar Jylla.
Kum ka dak jong ka jingplie paidbah ïa kane ka hospital kaba don kumba 200 tylli ki jingthiah, yn sdang shwa lyngba ka Outpatient Department lane ka OPD Block bad yn pyntreikam pura pat ïa kiwei tnat ai jingsumar hadien kumba 3 bnai eiei bad ki nongpynïaid jong kane ka hospital ki kynthup naduh u Bah A.L. Hek, u Bah Aibansharai Nongsiej, u Dr. Mahamaya Prasad Singh, Dr. Sandeep Rai Das, Dr. Jadunarh Burogohain, u Dr. Rubaiya Anam, u Dr. Simranjeet Singh, u Dr. Firoz Ahmed, u Kamal Goyal lem bad u Parag Chutiya.
U Bah A.L. Hek haba kren ha kane ka sngi kum uwei na ki nongpynïaid jong kane ka hospital u la pynpaw ïa ka jingsngewkmen halor kane bad ka kynhun ban pynïoh ïa ka Jylla ïa kum kane ka jaka ai jingsumar kaba heh bad ka ban shakri ruh ïa kiwei de ki nongpang na kiwei ki Jylla jong ka Thaiñ Shatei Lam Mihngi.
U la ïathuh ruh ba la plie ïa kane ka jaka ai jingsumar kaba don 200 jingthiah na ka bynta ban shakri ïa ki paidbah kiba ngat ha ki jingpang kiba bun jait kynthup naduh ka jingpang bampong, ka jingpang klongsnam bad kiwei-kiwei katkum kane ka juk stad kaba mynta ryngkat ka jingïatrei lang bad ki doktor ba la pyntbit kyrpang kiba la shemphang bha bad kiba la pawnam ha ka ri.
