Shillong, Lber 31
Ka Laitjem Cricket Club bad ka Lumpaia Avengers Cricket Club ki la khur jingjop ha ka lympung 3rd District League T20 Cricket Tournament 2024 ba la pynlong da ka East Khasi Hills Cricket Association ha Smit.
Haba phai sha ka jingïalehkai kaba nyngkong, ka Laitjem hadien ba jop ïa kynting pisa ka la kam trai ban kawang bol nyngkong, ha kaba ki la lah ban khanglad noh ïa ki nongtied ka Cricket Smit Cricket Club ba kin lah ban kamai tang 120 run na ki 20 tylli ki over bad hap haduh 8 wiket.
U Elbrenroy Mawthoh marwei u la tied haduh 60 run na ki 60 tylli ki bol bad u Manchester Pathaw pat u la khur 3 wiket na ki 4 over bad ai 15 run.
Haba beh ïa kane ka thong kaba rit, ki nongtied ka Laitjem ki la lah ban pyndep noh ha ka over kaba 17.1 kata ban kamai 121 run bad hap tang 2 tylli ki wiket, ha kaba u Poilangson Thawmuit marwei u la lah ban tied haduh 63 run na ki 56 tylli ki bol katba u Raymond Thabah u la khur 1 wiket bad ai 30 run na ki 3 tylli ki over.
Ka Laitjem ka la jop ïa ka jingïalehkai da 8 wiket bad u Poilangson Thawmuit uba la tied 63 run run, u la khur ïa ka khusnam ‘Player of the Match’.
Haba phai pat sha ka jingïalehkai kaba ar jong kane ka sngi, ka Thynroit Cricket Club kaba la jop ïa ka jingkynting pisa bad kam trai ban tied nyngkong, ka la lah ban kamai tang 75 run na ki 17 tylli ki over bad hap lut baroh ki wiket.
Dei tang u Darikupar Warjri marwei uba la tied 12 run na ki 8 tylli ki bol, katba kiwei pat kim shym la lah satia ban shan hakhmat ki nongkawang bol ka Lumpaia Avengers, bad u Bryan Mac Millan Marbañiang marwei u la khur 4 wiket bad ai tang 14 run na ki 3 tylli ki over.
Haba beh ïa kane ka thong kaba heh, ki nongtied ka Lumpaia Avengers Cricket Club ki la lah ban pyndep tang ha ka over kaba 9.4, da kaba kamai 77 run bad duh noh tang 4 wiket, ha kaba u Ralphy Diengdoh u la tied 30 run na ki 18 tylli ki bol, katba u Elbestar Warjri u la ïoh khur 2 wiket na ki 3 tylli ki over bad ai 14 run.
Kane ka la pynlong ïa ka Lumpaia Avengers CC ban jop da 6 wiket bad ha kane ka jingïalehkai ïa ka khusnam ‘Player of the Match’ la ïoh da u Bryan Mac Millan Marbañiang.
