Shillong, Lber 31
U Manager jong ka Bayern Munich u Thomas Tuchel u la ong ba ka jingïakhun na ka bynta ban ïoh rah ïa ka nam lahduh jong ka lympung Bundesliga mynta ka la kut, wat la ka Bayern Munich kan dang hap ban ïakhun sa hynñiew sien ha kane ka lympung.
Kane ka jingpynpaw jong u Thomas Tuchel ka la long hadien ba ka Bayern Munich ka la shah pynliem noh da 2-0 kol ha ka Borussia Dortmund ha ka jingïalehkai kaba la long ha la ïing.
Ha kane ka jingïalehkai, ïa ki ar tylli ki kol ka Dortmund la ïoh ban thep da u Karim Adeyemi ha ka minit kaba 10 bad u Julian Ryerson ha ka minit kaba 83. Ka ne ka dei ruh ka jingjop ba nyngkong ïa ka Dortmund naduh u snem 2019.
Kane ka jingshah rem, ka la pynlong ruh ïa ka Bayern Munich mynta ban duna da 13 point hadien jong ka Bayer Leverkusen kaba don ha ka kyrdan kaba nyngkong, kaba la lah ruh ban pynliem da 2-1 kol ïa ka Hoffenheim ha ka Sngi Saitjaiñ.
Haba kylli, hato ka Bayern Munich ka la long shabar mynta na ka jingïakhun ban rah ïa ka nam lahduh, u Tuchel u ban sa mih noh na kane ka club u la ong, Hooid, kan nym lah shuh. U la ong ruh ba hadien kane ka jingïalehkai, ym donkam shuh ban dang ñiew ïa ki point, kumba long mynta haduh katno la don bad ha kajuh ka por u la ai khublei ruh ïa ka Bayern Leverkusen.
Katba na ka liang u Manager ka Bayern Le-verkusen u Xabi Alonso u la pynthikna ba un dang ïai don bad kane ka club ha ka aiom ban wan bad ban pynkut ïa ki khubor hamsaïa ba u lah ban leit shimti noh ïa ka Bayern Munich ne Liverpool.
U Alonso mynta u la don ha ka lynti ban ïalam ïa ka Leverkusen sha ka nam lahduh kaba nyngkong, ha kaba ka club ka donkam sa tang 3 tylli ki jingjop na ki hynñiew tylli ki jingïalehkai kiba dang sah bad ban khang lynti ïa ka Bayern Munich ban jop ïa ka nam lahduh kaba 12 sien kynthih.
