Shillong, Lber 31
Ka jinglah jong u Andy Mawthoh ban ïoh khyrwit ïa ka hat-trick, ka la pynlong ïa ka Ryntih Sports Club ban lah pynliem kput ïa ka Nongthymmai Sports Club ha ka jingïa-lehkai jong ka lympung Shillong Premier League (SPL) 2023 ba la pynïaid da ka Shillong Sports Association (SSA) kaba la long ha madan SSA Stadium ha First Ground, Polo, ha ka Sngi Saitjaiñ.
Ha kane ka jingïa-khun, ka Ryntih SC ka la lah ban pynliem noh ïa ka Nongthymmai SC da 5-0 kol. U Andy ha kane ka jingïakhun u la ïoh ban khyrwit ïa ki kol jong ka Ryntih ha ka minit kaba 25 jong ka kylla step bad ha ka minit kaba 64 bad 68 jong kylla miet. Katba ïa kiwei ar tylli ki kol la ïoh thep da u Baneh-skhem Khongsdam ha ka minit kaba 75 bad 90’+4.
Ka Ryntih SC kaba la ïakhun haduh 3 sien ha kane ka lympung, ka la mad ïa ka jingïakhaid ha ka jingïalehkai pyrshah ïa ka Mawlai Sports Club, ban shah rem hakhmat ka Shillong Lajong Football Club bad ha kane ka sngi pat ka la ïoh ban khur ïa ka jingjop kaba nyngkong da kaba pynliem noh ïa ka Nongthymmai SC.
Haba phai sha ka jingïalehkai, wat la ka Nongthymmai SC ka la ïalehkai bha bad ka la ïoh katto katne tylli ki kabu hynrei kam shym la lah ban thaw pyrthei eiei. Hadien kane, ka Nongthymmai ka la ïoh biang ïa ka kabu, hadien ba la mih bujli u Iohborlang Nonglyer ha kaba u la shut jam na jngai ïa ka bol hynrei u rangap kol ka Ryntih, u Dipanjan Debnath u la ïoh ban ïada noh ïa katei ka bol ban rung shapoh kol.
Lyngba kane ka jingjop, ka Ryntih mynta ka la kiew na ka kyrdan kaba hynriew sha ka kyrdan kaba lai da kaba ïa ryngkat point bad ka Mawlai SC kaba dang don sa kawei ka jingïakhun ha kti.
Ka jingïakhun ban wan pat jong kane ka lympung kan long ha ka Sngi Nyngkong hapdeng ka Mawlai Sports Club pyrshah ïa ka Sawmer Sports Club ha ka por 3 baje janmiet ha madan SSA Polo.
