Khliehriat, Lber 31
U kyrtong ka RDA, Bah Robertjune Kharjahrin u la ong ba ka la dei ka por ïa ki nongshong shnong Khasi bad Jaiñtia ban bujli noh ïa u MP na ka Shillong Parliamentary konstitwensi.
U la ong ïa katei haba kren ha ka jingïalang ïalap ilekshon kaba la long ha Khliehriat West, ha ka 30 tarik Lber.
“Nga burom ïa u Ma Vincent H. Pala hynrei haba phai ha ki jingthrang jingangnud jong ka konstitwensi la donkam ban bujli noh ym dei tang ïa u MP wat ïa ka seng ruh,” u la ong bad bynrap ba ki mat ki jura ki nongrim u ju dawa na ka por sha ka por kum ka ILP bad ynda haba la jop na la ka jong ka Jylla, hynrei kaba sngewsih ka long ba ynda la poi pat hapoh ka dorbar bah Parliament bad ynda haba ïatyngkhuh bad ka Sorkar Pdeng ym pat shym la ïohi ba kita jingthrang jingangnud kin urlong.
U la ai khublei ïa ki MLA kiba la sngap ïa ka sur jong u paidbah bad ka sur jong ki trai-ri trai-muluk ba ki la mynjur ïa ki rai, hynrei u la ong kaba sngewsih ka long ba ka Sorkar India haduh mynta kam pat shym la pynurlong ïa kane bad kaba kham sngewsih shuh shuh ka long ban mih ki jingkren na u MP (Pala) ban ong ba kane ka aiñ ka dei kaba la rim palat.
“Hooid nga ai khublei ïa u Ma Pala ba u la kren ha ka khyllipmat khatduh shuwa ban poi ka ilekshon hynrei ka por ka la dier ïa ngi kum ka Jylla ban ïoh ïa kane ka aiñ ïada ri bad nangne shakhmat ngi ïaid ban bujli noh ïa u MP bad ban pyntikna ban ïoh ïa kane ka aiñ ïada ri kaba bit ba biang,” u la ong.
U la pynkynmaw ruh ïa ki jingkren u Rev. Kharkongor shaphang ka ri bad ka jaidbynriew ba donkam ban ïada ïa ki lai tylli ki ‘K’, u ‘K’ uba nyngkong u dei ïa ka khyndew ka shyiap, uba ar ïa ka ktien ka thylliej bad uba lai ïa ka kur.
U la ong lada peit ha kine ki sngi kiba la dep ym lah ban len ba kum ka jaidbynriew bad kum ka Jylla ka ïatyngkhuh haba ïadei bad ka jinglong trai halor ka khyndew ka shyiap bad ki mar poh khyndew.
“Ka Supreme Court ka la ai ïa kata ka rai ban ong ba ka khyndew ka shyiap bad ki mar poh khyndew ha ka Jylla kam dei jong ka Sorkar hynrei ka dei jong u paidbah nongshong shnong. Hynrei kaba sngewsih pat ba ki wan kita ki aiñ khyllah ki bym ïadei dur eiei ruh em bad ka jingbat khyndew bat shyiap ka jong ngi,” la ong shuh shuh u Bah Kharjahrin.
U la ong ruh ba ka aiñ MMDR Act ka la pynkulmar ïa ki kam ki jam bad ïa ki jingtrei jingktah ha kaba ïadei bad ka jingtih ïa ki mar poh khyndew naduh u dewïong, mawshun, shyiap bad kumta ter-ter.
U la kyntu ïa ki paidbah ba kim dei ban sngewthuh bakla ba ka RDA ka ïeng ha ka nongrim ban pynjot ïa ka mei mariang, hynrei ka ïeng halor ka nongrim ba ki aiñ, lada ki wan ki dei ban ïadei dur bad ka rukom bat khyndew bat shyiap jong ka jaitbynriew.
U la ong ka MMDR Act ka dei ka aiñ ka bym ïadei dur bad ka jaidbynriew bad u la ai khublei ïa ka Meghalaya Assembly kaba la mynjur arsien arwat ïa ka rai ba dei ban weng noh ïa kane ka aiñ na ka jingtreikam na Meghalaya hynrei kaba sngewsih ka long haduh mynta ka President jong ka ri India bad ka Sorkar India kam pat shym la burom ïa kata.
“Ngi kular ba lada phi jied ïa u kyrtong ka RDA ngin leit ban ïasaid hapoh dorbar bah Parliament ban weng ïa ka MMDR Act na ka Jylla bad ban pyntikna ba kum kine ki aiñ kiba ïatyngkhuh halor ka jinglong trai ïa ka khyndew ka shyiap ka long ban pynbeit noh ïa kita ki jingeh,” u la ong.
Nalorkata, u la ong ka mat kaba ka RDA ka pyrshah ka long ruh ïa ka nongrim halor ka ‘Hindutva’ kumjuh ka UCC hapoh ka Jylla bad ri India hi baroh kawei.
Shuh shuh u la kyrpad ïa ki paidbah ba ha ka 19 tarik Ïaïong u bnai ban wan ban leit sha ka jaka thep vote bad ñion ïa u budam jong ka bom (UDP) bad pynjop ïa u ban long kum u MP khnang ban un ïoh ban ïasaid ïa ka khia ka shon ka Jylla.
