Shillong, Lber 31
U Myntri Rangbah ka Jylla, u Conrad K. Sangma ha ka Sngi Saitjaiñ u la ong ba ki pulit ki la ithuh ïa katto-katne ngut ki briew kiba suba donkti halor ka jingïap jong 2 ngut ki bar jylla ha Ichamati.
“Ïa mynta, ki pulit ki dang pynlong ka jingthwet. Ki la ithuh ïa katto-katne ngut ki briew bad ki dang wad ïa ki,” la ong u Sangma.
U Myntri Rangbah u la ong ruh ba yn ïaid shakhmat katkum ka aiñ bad kino-kino kiba donkti ha katei ka kam, yn pynshitom ïa ki.
Haba kylli la ki don ne em kiba shah kem, u la bynrap, “Ngi la pynsted ïa ka kam kumba nga ong, ngi la dep pynithuh ïa ki briew, ngam kwah ban shim kyrteng ne katno ngut, hynrei ngi la dep ithuh bad ngi ïaid shakhmat bad kane.”
Ha ka janmiet jong ka Sngi Balang ki pulit ki la lap ïa 2 tylli ki metïap jong bar jylla ba la suba jur ba ka jingkhlad ka lah ban dei na ka jingshah bom ïap ha ka shnong Ichamati kaba dang hap hapoh ka Sohra Civil Sub-Division.
Katkum ka jingpyntip ba la ai da u Superintendent of Police (SP) ka East Khasi Hills, la ong ba 2 ngut ki bar jylla kiba la suba shah bom ïap ki dei ba la tip kyrteng kum u Esan Sing bad u Sujit Dutta, ha kaba ïa ka metïap jong ki la lap na Ichamati bad Dalda.
Katkum ka khubor la ong ba hadien katei ka jingjia, ka jinglong-jingman ha Ichamati bad ki shnong ba marjan ka la shongsyier bha. Halor kane, na ka liang ka tnad pulit ka la bthah ba dei ban pynkhlaiñ ïa ki bor pahara ha ka thaiñ Ichamati ban peitngor ba kan ym don kano-kano ka jingkulmar bad pynmih ïa ka jingsngewpher jaidbynriew.
