Ha ka 31 tarik Lber, 2024, ka ‘erlangthari ha ryngkat ka jinghap slap ka la syllad ïa kiba bun ki bynta jong ka jylla. Ka la don ruh ka jingjulor jong ki ïing ki sem, jingkhyllem ki dieng ki siej, bad jinglip bording. Ïa kiba kum kine ki jingjia, ki mad na ka snem sha ka snem khamtam ha kane ka por ba ka jingkylla ka suiñ bneng bad ka jingkiew ha ka jingshit ka la kynrei na ka daw jong ka jingleh sat u khun bynriew ïa ka mei mariang.
Namarkata, ngin hap long kiba husiar ha kine ki sngi namar ka jinghap slap kan nang don. Ki paidbah nongleit nongwan ruh kin hap ban ïa phikir namar ka jingdon jong ki dieng kiba la synjor lane ka jingma na ka jingtwa khyndew. Na ka liang ka sorkar ka la dei ban buh da ki briew na ka tnat khlaw ban peit ïa kino ki dieng ba la dei por ban ot bad pynkhyllem noh khnang ba kan ym don jingma ïa ki nongshong shnong. Ha kawei pat ka liang, ka jingwan jong u slap ka la pynkhuid ïa ki nala bad ki surok bad ha kajuh ka por, ngi ïohi ïa ka jaboh jabaiñ ba ka um ka la lah ban sei kaba thew sha ka jingleh sat jong u khun bynriew hi na ka jingbret pathar ïa ki jakhlia.
Kiba kum kine ki jingjia ki pynkynmaw ïa ka jingdonkam ban sumar sukher ïa ka mei mariang bad ban ïada ïa ka na ka jingshah lehbeiñ. Ka pyrthei baroh kawei ka mad ïa ki jingjia bapher bapher na ka daw jong ka jingkylla ka suiñ bneng. Ka mariang ka la kylla. Ki aïom ruh i kumba ki la kylla lang. Ki jingthung jingtep ki shah ktah namar ka jingwan slap ba khlem dei por lane ka jingwan slap dier por. Ki tyllong um ki la rngad namar ka jingbym don jingïada ïa ki. Kiei kiei ki la kylla nadong shadong bad ki la ktah ïa ka koit ka khiah u khun bynriew satlak ka pyrthei. Ka ban pyllait im ïa ngi ka dei ka jinglong adkar bad ka jingburom ïa ka mariang kaba la theh kyrhai ki jingkyrkhu. Ki la don bun bah ki tynrai dieng ba la dep ban thung da ka sorkar bad ki kynhun shimet na ka por sha ka por. La donkam ban ïa khmih ïa kita ki tynrai dieng la ki dang don ne ki la shah bam shngiam ha ka ding namar ka jingthang dusmon ïa ki khlaw ki btap. Ka jingleh bym suidñiew ïa ki dieng ki siej ka wanrah ïa ka jingkordit. Ka jingpynsyllen ïa ki khlaw ka pynduna ïa u slap bad ka umbam umdih.
Ka jinglalot ka wanrah ïa ka jinglanot ha kiba bun ki liang. Kine ki jingkylla ha ka mariang ruh ka dei namar ka jinglalot kaba la palat liam jong u khun bynriew. Kumba ong u Mahatma Gandhi: Kane ka pyrthei ka la biang ban pyndap ïa ki jingdonkam jong baroh tangba ka dang duna palat ban pyndap ïa ka jinglalot jong baroh. Ka jingduna u slap bad ka jingshit kyrang ka wanrah ïa ka jingkordit bakhraw ïa u khun bynriew. Dang katto katne taïew mynta, ngi la mad ïa ka jingshit kaba shyrkhei bad kaba buh jingma shibun ïa ka koit ka khiah bad ka jingim jong ki briew. Ngin hap ban ïa kylla thiah kylla dem kumno ban sumar ïa ki khlaw ki btap bad ban pynbun ïa ka jingjyrngam lym kumta ki jingma kiba kham shyrkhei shuh shuh ki la ap lypa. Ngim lah ban ïalehkai bad ka Mei mariang kaba la ai ha ngi ki khun bynriew ïa ka spah ka phew lyngba ki jingdon jingem bapher-bapher. Ka jingleh kput jong ngi ki nongshong shnong ka la kyrtoh kylla na ka jingduna slap, ka jingjur ka jingshit, ka jingkyrduh um, ka jingbun ki jingpang jingshitom bad kiwei.
Ngi la sakhi hi ïa ka jinglut jong ki khlaw ki btap ha ka jylla na ki daw bapher bapher. Ngi tip ruh ba haba ngi pom ïa ki dieng ki siej, kan shimpor ban ïohi biang ïa ka jingjyrngam lane ngi lah ban ym ïohi shuh syndon. Hooid, ka roi ka par, ka donkam bha na ka bynta ïa baroh. Haba wan ka roi ka par, hap ban mait ïa ki dieng ki siej lane ban pynsyllen ïa ka jingjyrngam namar hap ban ai jaka ïa ki jingtei bapher bapher la ka dei ka surok, aspatal, skul, shlem treikam sorkar bad kumta ter-ter. Ha kiba bun ki khep, ngi hap ban ïapeiñ ïa ka jingjyrngam bad ka roi ka kiew. Shisien wan ki puh shilum, jlang jah rngai kiei kiei tang hapoh shi khyllipmat – ki lum ki madan namar ka roi ka kiew. Tangba, hato ka jingwanrah ïa ki jingtei bapher bapher ka lah mo ban ïaid lang bad ka jingpynjyrngam? Ka jubab ka long hooid.
