New Delhi, Lber:
Ka Election Commission jong ka India (ECI) ha ka Sngi Thohdieng ka la ong ba ka la ïoh ban pdiang ïa palat 79,000 tylli ki jingmudui lyngba ka ‘Vigil app’ ha kaba ïadei bad ki jingpynkheiñ ïa ka Model Code of Conduct naduh ba la pyntreikam ïa ka na ka jingdon jong ka ilekshon Lok Sabha 2024.
Ki la don palat ïa ka 99% ki jingmudui ba la lah ban khmih bniah bad lajan 89% na kine la lah ban khmih bniah hapoh ki 100 minit, la ong ka Commission.
La ong ba ki la don palat 58,500 tylli ki jingmudui kaba (73% baroh lang) kiba la long pyrshah halor ka jingleh beaiñ lyngba ka jingwah bad ka jingbuh ïa ki jingpynbna bad ïa ki Banner, 1,400 tylli ki dei halor ka jingsam ïa ka pisa, ki jing-ai sngewbha bad ka kyiad, katba 2,454 ki dei halor ka jingpynjulor ïa ki jingdon jingem jong kiwei pat.
Kumba la ïathuh ka Commission, la ong ba ki la don kumba 535 tylli ki jingmudui ha kaba ïadei bad ka jingbuh ïa ki tiar siat bad ki khubor byrngem, ha kaba 529 la dep ban khmih bniah bad lah ban weng ïa ki jingeh.
Ki la jandon kumba 1,000 tylli ki jingmudui kiba ïadei bad ka jingïoh jingtip halor ki jingïalap ilekshon kaba la ïaid palat pud, kynthup ha ka jingpyndonkam ïa ki tynghung bad ki kor pynsawa palat ïa ka por ba la buh.
Kumba la ïathuh ka EC, la ong ba ka dei ka jingpyndonkam kaba ïajan bad kaba pynsuk ha ka ban pyntreikam, ïa kane ka app la pynïasoh hapdeng ki briew bad ki District Control Room, ki Returning Officer bad ki kynhun Flying Squad teams.
Hadien ba la dep ban buh ïa ki jingmudui, ki nongmudui, kiba lah ban jied ïa ki kaiphot halor ki rukom pynkheiñ aiñ ha barieh, kin sa ïoh ïa u ID uba kham pher ha kaba kin sa lah ban buddien halor ki jingbuh jingmudui ha ki Mobile jong ki.
