Shillong, Lber 31
Hadien ba khlem don ki kyrtong kiba weng kyrteng noh ïalade, ka ilekshon sha Ïingdorbar Lok Sabha na Shillong bad Tura Parliamentary konstitwensi kan sakhi ïa ka jingdon jong 10 ngut ki kyrtong ki ban ïakhun ïa ka ilekshon ha kaba jingthep ‘vote’ kan long ha ka 19 tarik u Ïaïong.
La ong ba lait noh tang u kyrtong pynap lypa uba ym donkam ñiew lang, kiwei ki kyrtong kiba la thep kyrteng ban ïakhun ïa ka ilekshon kim shym la weng kyrteng noh ïalade tad haduh ka 30 tarik u Lber kaba dei ka tarik bakhatduh ban weng kyrteng.
Ka jingkhmih bniah ïa ki kot ki sla jong ki kyrtong kiba thep kyrteng ban ïakhun ïa ka ilekshon MP na kine ar tylli ki konstitwensi la peit bniah ha ka 28 tarik Lber.
Na Shillong Lok Sabha konstitwensi, ki don 6 ngut ki kyrtong kiba la thep kyrteng kiba kynthup ïa u MP ba mynta uba dei u kyrtong ka Indian National Congress (INC), u Bah Vincent H Pala, u Bah Robertjune Kharjahrin uba dei u kyrtong ka United Democratic Party (UDP) bad Hill State People’s Democratic Party (HSPDP), ka Kong Ampareen Lyngdoh kaba dei ka kyrtong ka National People’s Party (NPP), u Dr Ricky AJ Syngkon kum kyrtong ka Voice of the People Party (VPP), nalor ki kyrtong shimet kiba kynthup ïa u Prof. Lakhon Kma bad Peter Shallam.
U Bah Manuel Badwar u la thep kyrteng tang kum u kyrtong pynap lypa ka Indian National Congress (INC) bad ka kyrteng jong u kam don shuh mynta hadien ba u kyrtong bapura u don ha ka thup jong ki kyrtong kiba ïakhun.
Na Tura Lok Sabha konstitwensi, ki kyrtong ki kynthup ïa ka MP ba mynta ka Agatha K Sangma kaba dei ka kyrtong National People’s Party (NPP), u Saleng A Sangma kyrtong ka Indian National Congress (INC), u Zenith Sangma kyrtong ka Trinamool Congress (TMC) nalor u Labenn Ch Marak kum u kyrtong shimet.
Da ka jingbiang ki kot ki sla jong ki kyrtong bad ka jingtikna ïa ki kyrtong kiba neh ban ïakhun ïa ka ilekshon, mynta ka dei sa ka por ïa ki kyrtong ban nang pynjur ïa ka jingleit ïalap ilekshon sha kylleng ki jaka nangne shakhmat tad haduh ban da kut ka por ïalap ilekshon.
Ka Shillong Parliamentary konstitwensi ka don 36 tylli ki MLA konstitwensi bad ka Tura ka don 24 tylli ki MLA konstitwensi ha ka ilekshon sha Ïingdorbar Lok Sabha jong ka ri.
