Resubelpara, Lber 31
Ha kawei ka jingjia kaba ïasyriem kum ki jingjia kiba dang shu jia shen, la ïoh ban pyllait im sa ïa uwei u briew tang hadien khyndiat kynta ba u la shah rahbor na North Garo Hills (NGH).
Katkum ki tyllong khubor na ki pulit, u Leeku G. Momin (26 snem ka rta) na ka shnong Wageasi Abrong hapoh Kharkutta PS, u la shah rahbor ha ka kynhun jong 6-7 ngut ki runar katba u dang thiah ha Nokpante (jong u) ha ka por kumba 12:30 baje ha ka step Sngi U Blei.
Hadien ba la ïoh jingtip halor katei ka jingshah rahbor, ki pulit ka NGH lem bad ka kynhun 120 Battalion jong ka CAPF (Mendipathar) ki la her bran-bran ban pynlong ka jingwad ban pyllait im ïa utei uba shah rahbor.
“Ngi la ïoh ban pyllait noh ïa u najan ki khlaw jong ka Wageasi Abrong. Utei u briew u la ïathuh ba ki don kumba 6-7 ngut kiba la rahbor ïa u wat la kim don ïa kino-kino ki tiar pynmynsaw. Ka jingthwet ka dang ïaid bad ngi la pynlong ruh ïa ka jingtohkit,” la ong u SP ka NGH, u Bruno Sangma. Kumba ka long, ym pat shym la ïoh kem ïa kitei ki nongrahbor naba baroh ki la kah durkhmat ha katei ka jingjia. Wat la ka daw jong ka jingrahbor ym pat lah ban pyntikna, ki pulit ki la ong ba ka lah ban dei namar ka jingïashrut.
