Jowai, Lber:
Ka District Tuberculosis Officer, West Jaiñtia Hills ka la rakhe ïa ka ‘World Tuberculosis Day’ ha ka jingïalang kaba la long ha ka Sngi Palei hapoh District Library Auditorium, Mynthong halor ka mat, “Yes! We can end TB”, lane “Hooid! Ngi lah ban pynduh jait ïa ka jingpang TB”, ha ka jingïadonlang u Deputy Commissioner ka distrik, u Bah B.S. Sohliya, IAS kum u kongsan.
Ha ka jingkren, u kongsan u la ai ka jingïaroh ïa ki doktor bad ki kynhun jong ki halor ka jingtrei borbah na ka bynta ban pynduna ïa ka jingdon jong ki nongpang TB bad halor ka jingbteng ban bteng da ka thong ban pynduh jait ïa kane ka jingpang hapoh ka distrik.
Nalor nangta, u la pyrto ruh ïa ka jingtrei shitom jong ki dkhot ka tnad ka koit ka khiah ha kaba ïadei bad ki lad ai jingsumar, ka jingpynlong ïa ki jingwad bniah bad ka jingpyntreikam ïa ki prokram ai jingïada ban ïakhun pyrshah ïa ka jingpang TB. Nalor kata, u DC u la pynshlur ruh ïa ki ‘riewshimet, ki nongshong shnong bad ki kynhun kiba ïadon bynta ban ïatreilang khnang ban poi sha ka thong jong ka jingthmu.
Ha kane ka prokram, u kongsan u la pyllait ruh ïa ka ‘Music Video’ kaba ïadei bad ka jingpang TB ha kaba ka don ruh ïa ki khubor kiba ïadei bad ki jingïalap bad pynshai halor ki lad jingïada bad jingsumar ïa kane ka jingpang.
Na ka liang ka Dr. Evalyneda B. V. Laloo, District Medical Health Officer Cum District Tuberculosis Officer & DACO bad Dr. Dasngewhun Shadap, MOTC Jowai ki la ai ka jingkren kaba bniah halor katei ka phang bad halor ka jingkongsan jong ka jingrakhe ïa ka ‘World Tuberculosis Day’.
Ka Dr. Evalyneda ka la ïai ban halor ka jingkongsan jong kane ka sngi bad pynpaw ruh halor ki sienjam ba la pyntreikam na ka bynta ban pynduh noh shi syndon ïa ka jingpang TB. Da kaba pynpaw ba kane ka jingpang TB ka dei kaba lah ban ïada, ka la kyntu ïa ki briew ba kin shim ïa ki lad jingsumar ba tikna lada ki ïoh ïa kane ka jingpang.
Ha kane ka prokram la sam ruh ïa ki syrnot bad ki ‘memento’ da u kongsan bad kiwei sha kito ki dkhot kum ka jingithuh ïa ka jingnoh synñiang ka jong ki ha ka jingïakhun pyrshah ïa ka jingpang TB.
Na ka liang ka shlem treikam ka la pynlong ruh ïa ka jingïalehkai ‘Sport’ na ka bynta ki khynnah skul LP bad UP ha kaba la sam ruh ïa ki khusnam sha ki nongjop ha kane ka jingïalang.
Kham hashuwa, ka shlem treikam ka la sdang ïa kane ka prokram lyngba ka ‘rally’ ba la wan ïashim bynta da ki khynnah skul kiba rah ryngkat ki ‘placard’ kiba don ïa ki khubor ïalap halor ka jingpang TB bad ki lad jingïada hapoh ka imlang sahlang. Kane ka ‘rally’ ka la ïaid lyngba na Ladthadlaboh, Newhill, Ïawmusiang, DC Office, Stand War bad pynkut ha District Library Mynthong, Jowai.
