Johannesburg, Lber:
Ki heh ka tnat Election Commission jong ka South Africa ha ka Sngi Palei ki la pynbna ba u President barim jong ka ri- u Jacob Zuma u la shah kyntait bad shah khang na ka ilekshon ka ban long ha u Jymmang namar ki daw kiba wanrah ia ka jingbym ibit ban ailad ia u ha katei ka ilekshon ka ban wan.
Namar la ong ba ka South Africa ka la dei ban pynlong ia ka ilekshon paidbah ha ka 29 tarik u Jymmang 2024 bad la ong ba kane ka sien thep vote kan long ka sien kaba shit rhem tam naduh ki snem 1994 ba katei ka ri ka la ioh ia ka hok synshar paidbah. Shuh shuh ruh la ong ba ka seng African National Congress (ANC) kaba don ha ka bor baroh shi katta, ka lah ban hiar hapoh ka 50% haba iadei bad ka jingioh jingkyrshan na ki paidbah ha kane ka sien namar ki kynrum-kynram bad ki jingkylla ha ki kam saiñ pyrthei ha katei ka ri kumba la iohi ia ka jinglong-jingman kaba pher ha kine ki sngi mynta.
La ong ba katei ka jinglah ban duh jingkyrshan jong katei ka seng ha kane ka sien, kan long namar hadien ba la bud nam ba katei sorkar ba mynta ka la jur bha ha ka bamsap wat haba ka jinglong-jingman bad ka ioh-ka kot ha katei ka ri kam long kaba bit- ba biang.
U Zuma, uba la don 81 snem ka rta, u la shah pynhiar shuki noh ha u snem 2018 halor ka jingshah pharep don kti ha ki kam bamsap hynrei haduh mynta ruh utei u nongialam u dang lah hi ban pynkhie im ia ka kam saiñ pyrthei jong u bad don ki paidbah kiba dang shaniah bad ai jingkyrshan ia u wat haduh kine ki sngi.
U Zuma u la mih ruh ban ïalap ilekshon na bynta ka seng Mkhonto we Sezwe (MK) kaba don sha ka liang pyrshah, ha kaba u la ñiew bad kdew kti ia ki dkhot ka seng barim jong u ba ki long ki ingkhong shyllangmat bad ki nongshet kylla.
