Lucknow, Lber:
Ka ïingbishar ba kyrpang jong ka Central Bureau of Investigation (CBI) ha Lucknow ha ka Sngi Thohdieng ka la rai pynrem ïa 7 ngut ki briew kiba la shah kynnoh donkti ban pynïap ïa u MLA jong ka seng Bahujan Samaj Party (BSP) u Raju Pal ha u snem 2005 bad rai ban set patok shirta jingim ïa 6 ngut napdeng kitei.
U runar bad uba la kylla long u ‘riew saiñ-pyrthei u Atiq Ahmed u la shah ïalam hakhmat jong ka ïingbishar ha ryngkat ka jingpynkhlaiñ ïa ka kynhun jong ki pulit pahara, ha Prayagraj, ha u snem 2023.
U Atiq Ahmad u la shah kynnoh ruh ba u la donkti ha kajuh ka jingjia hynrei ka jingbishar ïa u lem bad u para u Khalid Azim ïa uba la tip ruh da ka kyrteng kum u Ashraf la pynsangeh noh hadien ba ki la shah siat noh ha lai ngut ki runar kiba la leh mynleh kum ki nongthoh khubor habar ka jaka ai jingsumar kaba don ha Prayagraj mynshem snem.
Uwei pat uba la shah kynnoh donkti lang, u Rafiq Ahmed, u la ïap ha patok ha u snem 2020.
Ka Additional District Judge ka Kavita Mishra, kaba la khlieh ïa ka ïingbishar ba kyrpang jong ka kynhun CBI, ka la rai pynrem ïa u Abid Pradhan, Javed (ïa uba la tip ruh da ka kyrteng kum u Bachau bad Shamsul Haq), u Ranjeet Pal, Abdul Kavi, Gulhasan, Mohammed Farhan bad u Israr Ahmed hapoh kiba bun ki kyndon jong ka Indian Penal Code, kynthup hapoh ka 120B, 147 , 148, 149, 302 bad 307.
Ka ïingbishar ka la daiñ kuna ruh da mar T. 1.90 lak na kine kiba la shah rai pynrem.
Shuh shuh la ïathuh ba u Farhanwas u la shah rai ba un shah pynshitom da kaba shong patok saw snem hapoh ka jingtreikam jong ka kyndon 27 jong ka Arms Act bad sa kumba T. 25,000 la daiñ kuna ïa u.
Ka ïingbishar ka la rai ruh halor u Israr Ahmad uba dang phet rieh nakti jong ki pulit ha kaba un ym shah pyllait jamin halor ka mukotduma. Une u la shah thwet naduh u snem 2005.
