Shillong, Lber 31
U MDC ka Mawkynrew konstitwensi, Bah Martle Mukhim bad u MLA barim kane ka konstitwensi, Bah Remington Pyngrope ki la lum ïa ki nongkitkam kiba kham hakhmat jong baroh ar tylli ki seng, ka Hill State People’s Democratic Party (HSPDP) bad ka United Democratic Party (UDP) na ka bynta ban pynïaid shakhmat ïa ki kam jong ka Regional Democratic Alliance (RDA) ha kane ka ilekshon MP na ka bynta u kyrtong jong ka kynhun u Bah Robertjune Kharjah-rin.
U Bah Martle uba ïalam ïa ka HSPDP bad u Bah Remington uba ïalam ïa ka UDP ha Mawkynrew konstitwensi ki la lum ïa ki nongkitkam kiba kham ha-khmat ha Basic School Jongksha ha ka Sngi Saitjaiñ (30 tarik Lber).
Ha kane ka jingïakynduh lang kaba la pynïaid da u Bah Martle la shim ïa ka rai ban don ki nongkitkam ka RDA ha baroh 71 tylli ki shnong ka Mawkynrew konstitwensi ha kaba kawei ka shnong kan don 4 ngut ki nongkitkam, kata, 2 ngut na ka HSPDP bad 2 ngut na ka UDP ban pyntyllun ïa ka kam na ka bynta kane ka ilekshon MP ka ban long ha ka 19 tarik u Ïaïong.
U Bah Martle haba pynbna ïa kane ka rai, u la ong ba ka jingïalang ka la sngewdei ruh ba ki nongkitkam jong baroh ar tylli ki seng (HSPDP bad UDP) kin buh noh sharud ka jingsngew ïapher hynrei ban ïatreilang kawei ban pynïoh ka jingjop badonburom ïa u kyrtong ka RDA u Bah Robertjune Kharjahrin uba la ïeng kum u kyrtong ka UDP ha kane ka ilekshon.
Haba maitphang shaphang ka jingbteng biang ka HSPDP bad ka UDP ïa ka kynhun RDA, u Bah Martle u la pynkynmaw ruh ïa ki phew snem kiba la leit noh ha kaba ki MP kiba shahjied ki dei kiba ju mihkhmat na ki seng riewlum sha Parliament bad u pynkynmaw ruh ïa ka jingmih bun tylli ki seng riewlum kaba long ka daw ka jingtlot namar ka jingïapait.
U la pynkynmaw ruh ïa ka nongrim jong ki seng riewlum naduh ka por jong ka jingïakhih ban ïoh ïa ka Jylla lajong lyngba ka All Party Hill Leaders Conference (APHLC).
U Bah Martle kum uwei na ki nongïalam uba la rim bha ha ka saiñ pyrthei, u la kdew ruh ïa ki jingjia ha kaba ki seng riewlum ki la tylli ha ki por kiba mynshwa bad u la pyni nuksa ruh ïa ka jingïatylli ka HSPDP bad ka UDP hapoh ka RDA ym tang na ka bynta ka MP ilekshon hynrei halor kiba bun ki mat.
Kumta u Bah Martle u la ai khublei ïa ki nongïalam ka UDP bad HSPDP kiba la pynurlong ïa ka RDA bad kumjuh ruh ïa u Bah Remington uba kloi ban mynjur ban ïatreilang ha kane ka ilekshon MP kaba long thik kum ha ka ilekshon MDC ha u snem 2019 ha kaba la ïoh ïa ka jingjop.
Haba pynshai sha ki nongkitkam, u la ong ba ka UDP bad ka HSPDP ka la sei ïa u Bah Robertjune Kharjahrin kum u kyrtong uba la biang ka jingtip ban leit mihkhmat sha Parliament bad u kyntu jur ïa ki nongkitkam bad kumjuh ki nongkyrshan ka HSPDP bad UDP ha Mawkynrew konstitwensi ba kim dei ban sngewthuh bakla ban ong ba kane ka ilekshon MP kam dei ka kam jong u Bahheh (Martle) ne Paduh (Remington).
“Kane ka dei ka kam lang jong ngi bad ym dei satia ban sngewthuh bakla ba ka ilekshon MP kam dei ka kam jong u Bahheh ne u Paduh. Da ka jingïatreilang ngin shim kane ba ka dei ka kam jong ngi bad ka ilekshon MP ka dei kaba donkam tam ïa ngi,” u la ong.
U Bah Martle u kren ruh shaphang ka jingmih bun tylli ki seng thymmai naduh mynshwa da kaba ai nuksa ïa ka PDIC, PDM, KHNAM bad ong, “shu thymmai shi thymmai hynrei khlem poi shano-shano….. “
Na ka liang u Bah Remington u la ong ba ki nongkitkam jong baroh ar tylli ki seng kim dei ban rit mynsiem bad shah pynthame namar kano-kano kaba shu shongshit kam bha.
“Wat duh jingkyrmen wat rit mynsiem hynrei ngin ïatreilang hapoh ka kynhun RDA ban pynjop ïa u kyrtong ka RDA da kaba klet noh ïa ka jingsngew seng hynrei ngin buh hakhmat tang kawei ka thong ha kane ka ilekshon MP ban pynjop ïa u Bah Robertjune Kharjahrin u samla Rangbah uba la biang bha ban leit mihkhmat ïa ka Shillong konstitwensi sha Delhi,” u la ong.
Une u MLA barim ka UDP na Mawkynrew u la ong ba u MP ba mynta u Bah Vincent H Pala ruh u dei u paralok jong u tangba, donkam ban jied noh da uba thymmai da kaba phah ïa u Bah Robertjune kum u MP bathymmai ka Shillong ha Parliament.
Kumta u la pynpaw ka jingsngewnguh ïa u Bah Martle halor kane ka jingïatreilang bad u kyrpad ruh ïa baroh ki nongkitkam ka UDP ban ïasnohkti lang bad ki nongkitkam ka HSPDP ha kane ka ilekshon MP.
